Håper 200 meter knallgult strikk skal gjere inntrykk på politikarane

Nyheita om at utbetringa av hovudvegen mellom Nordmøre og Trøndelag er utsett har sett fart på temperamentet – og strikkepinnane.

Nesten 80 driftige damer har dei siste fjorten dagane strikka ei 200 meter lang gulstripe, for å symbolisere den etterlengta vegen. Dei meiner det hastar å få europaveg-standard med gul midtstripe umiddelbart.

– Vi vil ha E39 med gulstripe no, seier aksjonsleiar Solvår Skogen Sæterbø med ettertrykk.

Les også:

• Aksjonister går nye veier for å få frem budskapet sitt

Leita fram igjen strikkepinnane etter 15 år

Juanita Møkkelgård har ikkje hatt eit strikketøy i fanget på 15 år. Då ho høyrde om den uvanlege aksjonen for betre veg, kasta ho seg på.

Søndag ettermiddag møttest kvinner frå fleire nordmørsbygder for å gje frå seg det uvanlege handarbeidet dei har hatt mellom hendene dei siste dagane. Nokre strikka framleis då NRK besøkte dei.

– Eg er med fordi dette høyrest så tullete. Når vi lagar gulstripe, så synest vi vegvesenet kan lage vegane også, seier Møkkelgård bestemt.

Skuffa over politikarane

Det var mange som var skuffa då det blei klart at det ikkje ligg pengar inne til vegen i statsbudsjettet for 2017. For strekninga mellom Halsa på Nordmøre og Hemne i Sør-Trøndelag låg inne i Nasjonal Transportplan med 20 millionar kroner i 2016 og 100 millionar i 2017.

No er tolmodet slutt, og torsdag skal strikketøyet overleverast politikarar i transportkomiteen på Stortinget. Komitemedlem Helge Orten (H) frå Midsund seier dette er høgst uvanleg.

– Dette er eit nytt og veldig artig påfunn som illustrerer problemstillinga på ein humoristisk måte opp i alt alvoret. Eg gler meg til å ta imot dei, dei har eit godt prosjekt, seier han.

– Men kan du love dei hjelp?

– Vi er i forhandlingar med KrF og Venstre og jobbar framleis med å få til oppstart så tidleg som råd, seier han.