Ved inngangen til skuleåret 2016–2017 blei det innført nye reglar for kor mykje fråvær elevane i dei vidaregåande skulane kan ha i Noreg. Grensa inneber at elevane ikkje kan vere vekke frå undervisninga meir enn 10 prosent av timane i eitt fag. Er dei vekke frå undervisninga meir enn dette får dei ikkje karakter i faget.
I dag er statistikken presentert. Og medan gjennomsnittet i Møre og Romsdal låg på 6 dagars fråvær i 2015–2016 er dette redusert til 3 dagar for 2016–2017.
– Desse tala er svært gledelege for skule-Noreg. Reglane som blei innført svært raskt før dette siste skuleåret ser ut til å ha gjeve svært gode resultat. Og for Møre og Romsdal ser det ut til at vi får gode indikatorar på gjennomføringsgraden også, seier utdanningssjef Erik Brekken til NRK.
– Stor nedgang på yrkesfag
Møre og Romsdal har også tidlegare hatt lågare fråvær i den vidaregåande skulen enn landsgjennomsnittet. Og no ser ein at reduksjonen i dei yrkesfaglege studieretningane er ekstra stor.
– Det er ekstra gledeleg at vi har fått ned fråværet på yrkesfag. Det er der utfordringa med fråvær har vore størst, seier Brekken.
– Og det er ingen tvil om at det er endringa av reglane som er årsaka til nedgangen?
– Det er i alle fall her vi har eit stort knekkpunkt i statistikken. Vi har vore tett på skulane heile vegen. Og alle rapporterer om at klasseromma har vore betydeleg betre oppfylt av elevar.
– Positiv utvikling
Reglane som blei innført før skulestart hausten 2016 var kontroversielle. Mange frykta for eksempel at fleire elevar ville gje opp halvvegs i skuleåret når dei såg at dei ikkje hadde godt nok frammøte på skulen.
– Dette har ikkje slått til. Vi har faktisk litt færre elevar som får «ikkje vurdert» som følgje av fråvær. Også dette er svært positivt, seier Brekken.
– Klare rammer
Med den nye fråværsgrensa har elevane fått eit nytt sett med tydelege rammer for kva som er forventa av frammøte. Nærvær skal føre til auka kunnskap, seier fylkesutdanningssjefen.
– Vi skal også klargjere ungdommane til det dei skal ut i etter vidaregåande skule. Over halvparten av elevane skal ut som lærlingar. Oppmøte, og å vere presis kvar dag, er eit viktig fortrinn. Fråværsgrensa har ført til at elevane møter opp på skulen i større grad enn før.
– Undervegs i skuleåret var det fleire som fortalde at elevar møtte opp til undervisning sjølv om dei var sjuke, og at fysisk frammøte var blir viktigare enn å vere til stades reint mentalt? ...
– Dette var ei av dei første meldingane som kom inn. Og vi hadde kanskje ei overdriva frykt for fråværsgrensa i starten. Intensiteten kring misnøye stilna svært mykje ut over i skuleåret, seier Brekken.
– Bråket stilna
Brekken kan heller ikkje sjå at grensa på 10 prosent fråvær har slått særleg sterkt ut i fag med få timar i løpet av eit semester. Også bråket kring køyreundervisning har stilna.
– Det har stilna her også. Så eg vonar at dei næringane som har vore direkte berørt av fråværsregelen har funne ein fin måte å møte kundane sine på, seier fylkesutdanningssjef Erik Brekken.