Hallgerd (66) nekta å bli pensjonist då ho mista jobben

Hopp til innhold

Saumoperatør Hallgerd Aure fører sofastoffet gjennom symaskina med kjappe, rutinerte hender ved møbelfabrikken Ekornes i Sykkylven.

Ho starta i jobben etter nyttår, til mange si store overrasking.

I sommar blei ho oppsagt frå møbelbedrifta Brunstad fordi dei skulle flytte delar av produksjonen til utlandet.

Familie og vener var sikker på at Aure kom til å pensjonere seg. Men det hadde ho ingen planar om.

– Eg tenkte, herregud, skal eg bli oppsagt like før eg blir pensjonist? Eg er jo ikkje der endå, fortel Aure. Det var Fri Fagbevegelse som først fortalde historia.

Søkte jobb

I haust gjekk møbelkommunen Sykkylven ut med ein storstilt kampanje fordi dei mangla 150 arbeidstakarar.

Aure fann ut at ho skulle sende inn ein søknad. Hos Ekornes fekk ho full klaff.

– Sønene mine kom med blomster. Dei syntest det var så kult at eg greidde å få meg ny jobb i min alder, ler saumoperatøren. Ho starta i yrket i 1977 og har fagbrev både i industrisaum og i industritapetsering.

Eldste nytilsette nokon gong

Produksjonsdirektør Ole Arne Ramstad i Ekornes har aldri opplevd å tilsette ein ny arbeidar med så høg alder. Då dei fekk inn søknaden, var kompetansen til Aure midt i blinken og avgjerande for at ho fekk jobben.

– Det er få søkjarar med den kompetansen. Vi har innsett for lenge sidan at vi sjølve må lære opp nytilsette i bedrifta. Og Hallgerd kunne gå rett inn i produksjonen nærast utan opplæring, seier Ramstad. Vanlegvis kan opplæringa ta fleire år.

Han er imponert over at den godt vaksne saumoperatøren turte å søke ny jobb.

– Det er sporty når du 66 år, seier Ramstad.

Vanskeleg etter fylte 58

Også Kari Østerud, som er direktør i Senter for seniorpolitikk, er imponert over Hallgerd Aure. Ho meiner historia til 66-åringen er heilt unik. Dei fleste som mister jobben i høg alder går av med pensjon, sjølv om dei ikkje ynskjer det.

– Jo eldre du er, dess vanskelegare er det å få ny jobb. Det viser både undersøkingar og statistikk, seier Østerud.

Etter fylte 58 år er det vanskeleg å bli kalla inn til jobbintervju, ifylgje senteret sitt barometer.

– Eg trur alle må skjerpe seg og ikkje sortere søkjarar basert på alder. Eg trur ein dermed går glipp av svært mykje kompetanse, seier Østerud.

Håper helsa held

Hallgerd Aure stortrivast i den nye jobben. Her får ho jobbe berre på dagtid og får fast løn, ikkje akkord.

– Det er også kjekt å bli kjent med nye kollegaer, seier Aure.

Ho har ikkje bestemt seg kor lenge ho skal jobbe før ho blir pensjonist. Aldersgrensa i bedrifta er 70 år og ho håper å behalde den gode helsa til det. Og når er ho klar for å gi seg er planane klare.

– Eg skal ha meg eit drivhus og så har eg jo handarbeidet mitt, seier Aure.