Langrennsløparen Martine Lorgen Øvrebust frå Stordal tok gull på 5 km klassisk under junior-NM i Jervskogen i Hommelvik laurdag.
– Dette hadde eg ikkje trudd. Eg vann fristil suverent fredag, men hadde ikkje venta å gå til topps i klassisk, seier stordalsjenta til NRK Møre og Romsdal.
Ho var 8,3 sekund føre Marte Mæhlum Johansen frå Østre Toten, som vart nummer to.
– Det er spesielt for meg å vinne i klassisk. Det vare eit tungt løp, der eg måtte jobbe hardt for å henge med, seier stordalsløparen.
Rann frå konkurrentane
– Det var lite snø og vanskelege forhold. Eg hadde lite feste på skiene, men det var planlagd. Eg tok det att i nedoverbakkane, og planen fungerte.
Fredag vann Martine Lorgen Øvrebust 10 km fristil i junior-NM. Då var ho heilt suveren i dei trønderske løypene. Ho kom i mål 1 minutt og 39 sekund føre sølvvinnar Kristina Skjevdal.
Supertalent
Martine Lorgen Øvrebust konkurrerer i Jenter 18, og må reknast som eitt av dei fremste norske langrennstalenta.
Søndag skal Øvrebust delta på Møre og Romsdal sitt lag på 4x3,75 km stafett i Hommelvik. Ho går saman med Ingvild Øye frå Hovdebygda og emblemsløparane Ingrid Nerem og Sigrid Jakobsen.
Resultat, junior-NM, 5 km klassisk, jenter 18 år:
1. Martine Lorgen Øvrebust Stordal IL
2. Marte Mæhlum Johansen NTG-L/ Østre Toten Skilag, 8,3 sek bak
3. Julie Victoria Berg, Leksvik IL, 13,2 sek bak