Mange kommunar og idrettslag har lagt opp til eit omfattande program med mellom anna bålbrenning, vardetenning og fakkeltog.
Men den delen blir avlyst på grunn av forbodet mot open eld, og sjølv om det er varsla noko nedbør søndag står den avgjerda fast, seier ordførar i Stordal, Charles Tøsse.
Tøsse, som òg er leiar i komiteen for grunnlovsjubiléet, må fram med plan B.
– Det er heilt utruleg å tenkje på at det vart slik. Spørsmålet var vel heller om det var mogeleg å kome seg opp på ein fjelltopp for å tenne ein varde. Vi tenkte ikkje på at bålbrenninga måtte avlysast, seier Tøsse.
Håper på stor oppslutning
Komiteen hadde eigentleg tenkt å ha eit flott arrangement med fakkeltog frå sentrum i Stordal og opp til Stordalshallen.
– Deretter skulle vi ha vardebrenning på to av dei nærmaste fjelltoppane. Fakkeltoget og vardebrenninga må vi naturleg nok avlyse. Men resten av programmet vårt skal gå som planlagd, seier ordføraren.
Han er sikker på at det vert stort oppmøte sjølv om eld ikkje er ein del av arrangementet. Det er òg spanande planar for resten av kvelden i Stordalshallen.
- Les også:
– Vi skal ha ei lokal markering av grunnlovsjubiléet der engasjerte skuleelevar skal opptre med song og musikk.
Meldt regn søndag
Yr.no melder nedbør over store delar av Møre og Romsdal komande søndag. Men meteorologen i NRK meiner likevel at regnet som kjem då ikkje nødvendigvis tek knekken på brannfaren.
Tøsse trur at det vil vere i grenseland å gjere opp eld utandørs sjølv om det vert våtare i vêret. Han viser til dei store brannane som har herja langs kysten i vinter, og meiner at det er ingen grunn til å ta sjansen i helga.