Folk på Godøya er lei av å køyre i ein trafikkfarleg tunnell. Sjølv om tunnellen er høgt på lista over prosjekt som treng renovering, kan det ta mange år før fylkeskommunen har pengar til å gjere arbeidet. No krev folk strakstiltak.
– Det renn sjøvant og det blir veldig glatt, seier pendlar Ove Paulsen.
– Med dårleg asfalt i tillegg er det farleg å køyre i tunnelen.
Farleg
2000 bilar køyrer gjennom tunnelen kvar dag, og sjøvatnet uroar dei som brukar tunnelen. Folk er redde for at det skal skje trafikkulukker og at bilane deira vert øydelagd.
– Vi ser at bilane rustar mykje fortare enn normalt, seier Paulsen og legg til at det kjem til å bli endå farlegare å køyre der når vinteren kjem.
– Når vi skal køyre med piggdekk blir det en graut med sjøvatn og asfalt nederst i tunnelen.
Opprørt
Den 26 år gamle tunnelen blir fort eit tema når folk på Godøya treff kvarandre. Mange er opprørte.
– Vi føler oss svikta. Tunnelen var prioritert for renovering, men pengane gjekk andre stader. Tunnelen kjem ikkje til å bli renovert før om 8-10 år. Det er alt for lenge til, seier Hans Petter Godø, leiar i Godøy nærmiljøutval.
Det er politikarane i fylket som har ansvaret for pengar til tunnellen, men der er det lite å hente. Pengane er nemleg brukt på Fannefjordtunnellen i Molde.
Leiaren i samferdselsutvalet, Oddbjørn Vatne, seier at dei måtte ta pengane frå Godøytunnelen.
– Fannefjordtunnelen vart dobbelt så dyr, og derfor måtte vi ta pengane frå ein plass, seier han.
– Ein må nok tåle at tunnelen lek. Men viss det går på tryggleiken må ein gripe inn.