Oversikta er utarbeidd av fylkeskommunen, med representantar frå Fylkesmannen, Helse Møre og Romsdal og kommunane som bidragsytarar.
– Fylkeskommunen ønsker å ha ei god oversikt over helsetilstanden i befolkninga og dei faktorane som påverkar helsa til innbyggarane i Møre og Romsdal, seier Sigri Spjelkavik, folkehelserådgivar i fylkeskommunen.
Ho trur oversikta vil vere viktig for å kunne følgje utviklinga i fylket og jobbe målretta med å betre helsetilstanden og auke trivselen i befolkninga.
– Oversikta legg grunnlaget for å kunne jobbe langsiktig og systematisk, men og i forhold til eit meir kortsiktig folkehelsearbeid, seier Spjelkavik.
- Les også:
Over landsgjennomsnittet
Ifølge Spjelkavik er folkehelsa til innbyggarane i Møre og Romsdal generelt god, og levealderen ligg litt over landsgjennomsnittet.
– Innbyggarane her lever litt lenger. I tillegg har vi små forskjellar i levealder knytt til fullført utdanningsnivå samanlikna med resten av landet, seier Spjelkavik.
– Vi har nokre utfordringar knytt til eitt par livsstilssjukdomar der vi ligg litt over snittet, men jamt over ligg vi godt an, held ho fram.
Undersøkingar i ungdomsbefolkninga gjennom Ungdata syner at ein del ungdommar, og særleg jenter, er plaga med depressive symptom.
– Men også her ligg vi betre an enn landet. I folkehelsesamanheng er det viktig å ha fokus på tilstandar som har eit vesentleg førebyggingspotensial og som har relativt stor utbreiing i befolkninga. seier Spjelkavik.
- Les også:
Fleire faktorar
Spjelkavik fortel at det er fleire faktorar som bidreg til å påverkar helsetilstanden vår.
Tilhøve knytt til samfunnet generelt, sosiale nettverk og individuelle livsfaktorar er blant dei viktigaste faktorane.
– Som døme kan eg nemne utdanningsnivå og inntekt, arbeidsmiljø, fysiske omgjevnader, relasjonar til andre i lokalsamfunnet, offentlege tenester og helsevanar, seier Spjelkavik
