– Verdig vinnar
Fet har skrive to bøker om skriftleg og munleg kultur blant bøndene, men har og gjort ein stor innsats i arbeidet med folkemusikkarkivet i Møre og Romsdal.
Ein verdig vinnar, meiner leiaren i fylkeskulturutvalet, Frøydis Austigard.
Jostein Fet (Foto: NRK)
Jostein Fet er opphaveleg frå Sykkylven, men har vore busett i Volda det meste av sitt vaksne liv.
Av utdanning er Jostein Fet cand. philol. og av arbeidsstadane hans bør nemnast Telemark landsgymnas, Volda lærarskule, Møre og Romsdal distriktshøgskule og Høgskulen i Volda.
Forfattar
Jostein Fet har gjennom 20 års innsats som nasjonal granskar av den munnlege og skriftlege allmugekulturen mellom anna gitt ut monografiane Lesande bønder (1995) og Skrivande bønder (2003). Blant fagfolk blir forskingsarbeidet til Jostein Fet sett på som banebrytande for kunnskapsdanning og oppfatning om det gamle bondesamfunnet.
Folkemusikkarkivet
Jostein Fet har i 11 år av si pensjonisttid vore sentral i arbeidet for å etablere Folkemusikkarkivet i Møre og Romsdal og stått for organisering og innsamling av folkemusikkskatten i fylket. Han var med andre ord sentral i arbeidet med å berge ein kulturarv som var i ferd med å gå tapt i det norske musikklandskapet. Som eit resultat av innsamlingsarbeidet gav han også ut boka Folkemusikken i Møre og Romsdal.
Fortenestemedalje i gull
Jostein Fet har feira 80-årsdag i år og mottok nyleg Kongens Fortenestemedalje i gull for sitt breie samfunnsgagnlege arbeid.
Fylkeskulturprisen består av eit pengebeløp på kr 35.000 og eit diplom. Prisen blir delt ut under opninga av fylkestinget si samling 13. desember i Kristiansund.