Lokalkjende folk opplyser til NRK at det kan vere så mykje som 7500 høns i hønseriet som står i flammar.
– Vi kan ikkje stadfeste at det har vore 7500 høns i hønseriet, men det er i den størrelsesorden, seier operasjonsleiaren ved Sunnmøre politidistrikt til NRK.
Det skal ha teke til å brenne om lag klokka 19.45. Hønseriet blei overtent etter kort tid og det var store flammar då brannvesenet kom til staden.
Brannvesenet i Volda fekk etter kvart kontroll over brannen i den forstand at det ikkje var fare for at brannen skulle spreie seg. Men store verdiar har gått tapt.
– Det ser ikkje ut til at vi klarer å berge noko av det som var i bygningane. Arbeidet no handlar om å avgrense brannen mest mogleg, opplyser politiet.
Sist NRK besøkte hønseriet på Kornberg var etter orkanen Dagmar. Den gongen var bygda straumlaus fleire døgn etter at andre hadde fått tilbake straumen. Også forsiloen var øydelagd etter Dagmar sine herjingar.