Fryktar fleire turistulukker framover

– Super, ehm ... Trollstigen!, smiler Rechard Chanicaki – éin av mange turistar i Trollstigen for tida.

Chanicaki er derimot litt rart plassert, med hendene over ein stor stein.

Heile poenget med posituren er å sikre eit bilde der det ser ut som han heng på kanten av eit stup.

Redd for fleire ulukker

Denne veka har det vore to svært alvorlege ulukker med turistar involvert i Møre og Romsdal.

Onsdag blei ei tysk 13 år gammal jente frakta til St. Olavs hospital etter å nesten ha drukna i elva Rauma.

• Les også: Alvorleg, men stabilt for den unge jenta
• Les også: Redda livlaus 13-åring etter kanoulukke

Torsdag denne veka blei utfallet fatalt, då ein 56 år gammal turist kryssa tausperringar i Geiranger og fall i ei brusande elv .

No fryktar turistnæringa fleire ulukker.

– Litt av kvart kan skje

Reiselivssjefen i Rauma, Hilde Gråberg Bakke, er redd for kva turistane kan finne på i dramatiske Trollstigen.

– Med så mykje dramatikk som her i Trollstigen kan litt av kvart skje. Samstundes set vi stor lit til at turistane som besøker oss tek ansvar, seier ho til NRK.

Trollstigen-området er godt innegjerda, men ved fleire høve har det blitt observert turistar langt ute på livsfarlege «utkiksplatå».

– Eg har høyrt historier om folk som har gått frampå kantar. Det er klart vi ikkje kan forhindre sånne ting.

• Les også: Kan ikkje gardere seg mot manglande vit
  
• Les også: – Turistene har ikke nok respekt for naturen

Ikkje redde

På Trollstigen torsdag prata NRK med fleire tilreisande. Dei frykta ikkje den norske naturen.

– Nei, det er ikkje farleg, det er berre å vere forsiktig. Eg er forsiktig, sa Anna Lopez.

Likevel, naturen i Noreg kan vere livsfarleg. På Trollstigen er der inga skilting som åtvarar mot alle farane.

– Det er alltids eit spørsmål. Vi kan sikkert setje opp både eitt og 10 skilt, men det er eg ikkje tilhengar av, seier Gråberg Bakke.

– Eg er tilhengar av at folk skal få nyte og kjenne sine grenser.