– Dette blir strålande! Vi håpte på AaFK eller Hødd, og no fekk vi Aalesund.
Det seier Anders Vaagen i Larsnes/Gursken. 17. april kjem nemleg AaFK på besøk til Gursken stadion, eller River Plate som bana blir kalla, for å spele 1. runde av NM.
– Dette vil nok skape ein del blest, ja. Allereie no er det bra aktivitet på Facebook, så dette blir nok stor ståhei.
– Kva sjansar har de mot AaFK då?
– I utgangspunktet skal vi ikkje ha mykje å stille opp med, men eg kan love at vi skal gjere alt vi kan. På ein superdag kan alt skje, meiner ein glad Vaagen.
– 2000 på kamp sist
I Elnesvågen har jubelen òg stått i taket. Elnesvågen & Omegn får nemleg besøk av Molde.
– Det blir kjempemessig. Artig! Det kunne ikkje blitt betre, seier Bjørn Espen Vatne, trenar og spelar i klubben.
– Noreg sitt beste lag dei siste to sesongane kjem på besøk, så dette blir ei stor hending.
Vatne fortel at Molde òg var på besøk for 3–4 år sidan.
– Då var det over 2000 menneske på kamp. Vi håper sjølvsagt på det same no.
– Kor store er Elnesvågen & Omegn sine sjansar i kamp mot Molde då?
– I utgangspunktet er vel sjansane i favør Molde, men fotballen er rund, avsluttar Vatne.
1. runde i Møre og Romsdal:
1. runde av NM blir spelt 16., 17. og 18. april. Fire av fem kampar, med lag frå Møre og Romsdal involvert, går 17. april.
17. april:
- Larsnes/Gursken FK – Aalesund FK
- Brattvåg IL – IL Hødd
- Elnesvågen & Omegn IL – Molde FK
- SK Herd – Kristiansund BK
18. april:
- SK Træff – Skarbøvik IF