Det var sist onsdag ålesundaren Bjørn Birkevold (33) slo til. Frieriet hadde han planlagt i fleire månader, men venta på at alt skulle klaffe, ikkje minst med vêret. For planen var å gå opp på Slogen, som blir rekna for sjølve dronninga av sunnmørsfjella.
– Eg hadde ein sekk klar der eg hadde rulla smokingen så godt saman som eg kunne, elles ville jo folk spurt meg kvifor eg hadde så mykje i sekken, seier Birkevold og ler.
Les også:
Trudde det var ein spøk
For etter å ha klatra seg 1564 meter til topps på fjellet Slogen på Sunnmøre, bad han kjærasten, Stine Marie Urestad Nilsen frå Kristiansand, om å lukke auga.
– Eg høyrde at han begynte å kle av seg, og då tenkte eg berre at det var noko tull. Eg slo berre frå meg at det var eit frieri, men forventa at han kom til å stille opp i eit kostyme eller kanskje skulle hoppe i fallskjerm eller noko slikt, ler ho.
Og medan ho sat med auga igjen, tok han av seg dei sveitte treningskleda, leitte fram kvitskjorta, smokingen, sløyfa, lakkskoa – og ringen. Alt medan hjartet hamra i brystet.
– Då eg gjekk opp gledde eg meg, men med ein gong eg begynte å skifte blei eg veldig nervøs, ler han, og seier han har problem med å huske heilt kva han sa då ho endeleg fekk opne auga.
– Eg prøvde å seie noko vettig og kanskje romantisk, og reklamerte for eit ja, seier han.
Les også:
Fekk ja frå den komande bruda
Og ho som no har fått ring på fingeren, var ikkje sein med å svare ja til han som ho har vore kjærast med i fem år. Begge to er legar på legekontoret i Stranda, og det var ein tredje kollega som både spleisa dei to, og som også var fotografen bak det flotte bildet.
– Eg syns det var det beste frieriet, det var veldig kreativt og originalt, det likar eg, seier ho.
Fotografen skjønte ingenting
Heller ikkje kameraten Mikkel Ranheim, som blei spurt om å bli med på fjellturen, forstod kva som var i gjære. I det dei kom på toppen fekk han eit kamera i handa og diskret beskjed om å fotografere. Bildet er no lagt ut på Facebook-sidene til det komande ekteparet, og har fått hundrevis av likes og gratulasjonar.
– Eg brukar ikkje å ta bilde, men det var fantastiske omgjevnader og eit fint motiv, så det var nok meir det, enn fotografen, seier Ranheim smålåten.
Han ante ikkje ugler i mosen før kameraten drog fram smokingen.
– Det var veldig fint, det er ikkje alle som får æra av å vere til stades under eit frieri, seier han.