Det opplyser Helse Møre og Romsdal.
Kvinna i 20-åra er innlagt ved intensivavdelinga ved Ålesund sjukehus og skal vere stabil.
Køyrde inn i ein fjellvegg
Det var i 11.20-tida søndag at politiet melde om ei trafikkulykke ved Magerholm i Ålesund.
Alle naudetatane rykte ut til staden der ein person sat fastklemt etter å ha køyrd av vegen og inn i ein fjellvegg. Brannvesenet måtte hjelpe til med å få personen frigjort frå bilen.
– Vedkomande blei henta av ambulanse og køyrd til sjukehus. Skadeomfang er så langt ukjent, sa Arild Reite, operasjonsleiar i politiet til NRK søndag formiddag.
Det var berre ein person i bilen då ulykka skjedde, og ingen andre bilar skal ha vore involvert.
Skal gjere undersøkingar på staden
Fylkesveg 656 blei stengt aust for ferjekaia på Magerholm i Ålesund som følgje ulykka. Politiet opplyser at vegen vil bli stengt i ei lengre periode på grunn av undersøkingar.
– Vi er på staden og gjer undersøkingar no. Vi ventar også på bistand frå Statens vegvesen si ulykkesgruppe. Dei vil kome med teknikarar for å gjennomføre sine undersøkingar. Dette vil nok ta fleire timar, seier Reite til NRK søndag formiddag.
Operasjonsleiaren seier det er for tidleg å seie noko om årsaka til ulykka.
Omkøyring blir skilta via E39/E136, opplyser Statens vegvesen.