Frå dåp til permitteringar

I dag var det fest og hornmusikk i Brattvåg. Dåpen av offshorefartøyet Normand Maximus er det siste som skjer ved verftet på lang tid.

Det er Vard som har utvikla skipet for reiarlaget Solstad. Fartøyet er det største som nokon gong har blitt utrusta ved eit norsk verft.

– Det er stor merksemd rundt denne båten. Fartøyet er banebrytande på mange måtar og det er klart at både vi og Solstad er stolt. Den betyr mykje for omdømmet til Vard at ein kan bygge slike komplekse skip, seier Fredrik Hessen, verftsdirektør i Vard Brattvåg.

• Les også: Lærerikt møte for statsministeren

Lite arbeid utover hausten

Skipet er 180 meter lag, 33 meter breiddt, og løftetårnet ruver 55 meter over dekket. Teknologien er den fremste i verda på dette området. Men det hjelper lite for dei rundt 150 fast tilsette ved verftet i Brattvåg.

Etter festen i kveld er det ferie for dei tilsette, og deretter permitteringar.

– Det er dessverre slik at når denne båten går så har vi ikkje meir arbeid før i januar 2017. Då kjem det eit nytt skrog frå Romania. Difor må vi dessverre sjå på permitteringar medan vi ventar på dei nye skroga, seier Hessen.

Årets sommarferie kan dermed bli svært lang for mange av dei faste tilsette som i dag avslutta ein sju månader lang intensiv byggeperiode. Men trass permitteringar, råder optimismen ved verftet i Brattvåg.

– Bygginga av dette fartøyet har vore eit kjempestort prosjekt. Vi har bygd ein svært stor båt på veldig kort tid, så dei fleste er vell innstilt på å ta det litt meir med ro det neste halvåret, seier Geir Pedersen, tillitsvalt i Fellesforbundet.

– Og så vil vi vere klar til kamp igjen i januar når dei neste to skroga kjem, held han fram.

• Les også: – Alt for mange rederier i dag
• Les også: Den største kontrakten noensinne