Tre kviger og to hestar omkom då eit fjøs i Rindal blei totalskadd i brann laurdag ettermiddag. I tillegg måtte ein kalv avlivast av veterinær.
Politiet fekk meldinga i 14.30-tida, og alle naudetatane rykka til staden. Det var full fyr i fjøset, men om lag 50 dyr vart berga.
Måndag fortel politibetjent Åse Berit Løseth ved Surnadal og Rindal lensmannskontor at dei vil engasjere krimteknikarar for å finne ut kva som er grunnen til brannen.
– Vi har ikkje undersøkt staden enno, men vi driv planlegging i samarbeid med krimteknikarar, seier Løseth.
Politiet har så langt ikkje mistanke om kva som er årsaka.
