I løpet av helga blei det stole 7 båtmotorar i Rauma i Møre og Romsdal. Politiet fryktar at langt fleire motorar kan ha hamna i hendene på tjuvar.
– Ja, det fryktar vi. Vi har no starta etterforsking på dei 7 sakene vi har fått melding om. Men vi treng tips frå publikum for å få vite meir, seier politibetent Kathe Venås Foss.
Tjuveria ser ut til å ha gått føre seg over store deler av Vestlandet. I Sogn og Fjordane var det sist veke registrert 13 tilfelle av grove tjuveri frå fritidsbåtar. Også på Sunnmøre er det den siste veka meldt om fleire båtmotorar som er borte.
– Vi vil gjerne ha tips om folk har sett noko mistenkjeleg natt til søndag og natt til måndag, seier Venås Foss.
- Les også:
- Les også:
I samband med fleire av tjuveria har vitne meldt frå om ein blå varebil med kvite skilt. I Sogn og Fjordane har etterforskingsleiar Rognald Dvergsdal uttalt at tjuveria framstår som godt planlagde, og at dei har få spor å gå etter.
– No har vi starta etterforskinga her, og vi vil også sjå om der kan vere nokon samanheng med andre tjuveri, seier Venås Foss.
– Har de nokon mistenkte i saka?
– Nei, det har vi ikkje. Ho legg til at båtmotorane kan vere transporterte bort enten med bil eller båt. Politiet har fått inn tips som dei no vil følgje vidare.
- Les også:
- Les også:
Natt til søndag blei båtmotorane stolne på Veblungsnes og natt til måndag på Stein i Isfjorden.