Fiskebåt kantra – mannskap på fire kom seg over i ein annan båt

Ein fiskebåt med fire personar om bord kantra i Syltefjorden på Sunnmøre fredag morgon.

Fiskebåt fekk slagside i Vanylven.

Redningsskøyta Idar Ulstein og ein lettbåt hjelpte til med å berge fiskebåten.

Foto: Tor Arne Aasen

Det var rundt klokka 06.00 fredag morgon at båten kantra i Syltefjorden i Vanylven kommune. Det var Hovedredningssentralen Sør-Noreg som først melde om hendinga.

– Vi fekk beskjed om at ein båt var i ferd med å kantre og starta ein aksjon, seier Steinar Vatne ved Hovedredningssentralen.

Dei fire om bord kom seg over i ein annan båt.

– Vi har snakka med dei og dei er i god behald. Dei skal aldri ha vore i vatnet, seier Steinar Vatne ved Hovedredningssentralen.

Han fortel vidare at personane som var om bord har truleg blitt frakta i land til næraste hamn.

Det er så langt uklart kva som var årsaka til kantringa.

– Det vil truleg dei vidare undersøkingane kunne gi svar på, seier Vatne.

Jobba med å berge båten

Redningsskøyta Idar Ulstein og ein lettbåt har fredag morgon jobba med å berge fiskebåten.

– Havaristen har blitt slept til eit grunnare område slik at den kan bli berga seinare i dag, fortel mannskapet om bord i redningsskøyta til NRK like før klokka 09.00.

Laster Twitter-innhold