– Me laga songen som ein hyllest til vår mor og far som tok oss med på ein sydentur, og så foreslo søstera mi Karianne at me måtte lage musikkvideo, seier artisten Henning Stranden.
– Så då gjorde me det, seier han.
Sjå musikkvideoen øvst i saka.
Over 10 000 visingar
Dei tre syskena Henning, Karianne, og Hilde spelte inn låten på førehand, og hadde den klar ein dag før dei skulle reise. Det var mest naturleg for dei at det blei ei dansebandlåt.
– Me skulle lage noko til mor og far som vart 60 år, så me kunne ikkje lage noko kjempemoderne. Nicki Minaj eller Justin Bieber hadde ikkje vore riktig, så det vart ei litt sydenaktig låt, seier Henning.
– Og foreldra vart nøgde med gåva?
– Me spelte den av på anlegget til mor og far si store begeistring. Den er jo meint til å vera litt humoristisk, for det er nokre rim der som ikkje heng på greip, seier Henning.
Videoen la dei ut på Youtube, og fekk over 10 000 visingar på ei veke.
– Det var me ikkje førebudd på. Det var veldig gøy, seier Henning.
Gir av seg sjølve
Artisten Henning vart lagt merke til då han var med på Beat for beat, og song «We are the world» på ein heilt eigen måte. Han har også hatt cupfinalesongen til Molde i 2005, og var med på songen til Jo Nesbø og Knut Marius Djupvik i fjor.
Då ferielåten og musikkvideoen til foreldra skulle lagast var det viktig for syskena at alle var med, også den yngste søstera Hilde.
– Ho har aldri sunge offentleg, men då me opptredde på karaoken på Rhodos, så sa ho «om eg ikkje kan synge, så skal eg iallfall ta det på show», seier Henning.
– Det er litt slik i familien, at me gir av oss sjølve. Me er ikkje veldig tradisjonelle moldensarar, seier han lattermildt.
– Moro å spele inn
Videoinnspelinga var ikkje nøye planlagt, men dei visste dei måtte ha nokre scenar ved symjebassenget. Det vart lagt merke til.
– Mange turistar lurte på kva i all verda me heldt på med der me stod og song, seier Henning og legg til at nokre scenar vart gjort tidleg.
– Me avtalte å møtast på stranda klokka seks om morgonen, og då var det ikkje så mange som var oppe. Då fekk me jobbe i fred, og slapp å drite oss ut framføre veldig mange, seier han.
Og no oppfordrar Henning andre om å også lage video.
– Det var veldig moro å spele den inn, så lag gjerne ei enkel sommarlåt og lag video, seier han.