Det var klokka 06.00 laurdag morgon politiet fekk beskjed om at det brann i ein einebustad i Ørsta. Brannvesenet kom først til staden og møtte ein einebustad som stod i full fyr.
– Huset var overtent då brannvesenet kom fram, fortel operasjonsleiar i Møre og Romsdal politidistrikt, Erik Mikalsen.
Dei fem personane som var i huset hadde klart å kome seg ut av huset sjølv. Tre av dei fem er sende til sjukehus for undersøkingar etter å ha fått i seg røyk.
Huset ligg i eit byggefelt, men politiet vurderte det slik at ein ikkje trengde å evakuere husa rundt.
– Det er ikkje fare for spreiing, opplyser Mikalsen.
Brannvesenet jobbar med å ettersløkke det totalskadde huset og politiet driv med etterforskingsarbeid på staden.