I 2018 vart Bygdepride arrangert for første gong, med markeringar både i Volda og Ørsta på Sunnmøre.
Arrangementet vart rekna som ein braksuksess. Fleire mindre stader har no gått i fotspora deira og arrangerer Pride for første gong i år.
Men før Bygdepride blir arrangert for andre gong i mai i år møter arrangørane eit skjer i sjøen.
– Opp til kommunane
Bygdepride søkte Volda og Ørsta om å heise regnbogeflagget på rådhuset under arrangementet. Volda kommune har sagt nei.
– Reglane seier at det er opp til kvar enkelt kommune. Men vi er skuffa og synest dette er eit merkeleg vedtak, seier leiar i Bygdepride, Anbjørn Steinholm Frislid.
I vedtaket, som først vart omtala i Møre-Nytt, blir det vist til at lovverket berre gir heimel for at norske og samiske flagg kan brukast på rådhuset.
– Tolka for snevert
Stortingsrepresentant Fredric Holen Bjørdal (Ap), som sjølv er frå Ørsta, meiner lovverket blir tolka for strengt.
– Det er fullt mogleg å gjere unntak frå hovudregelen i lovverket slik at regnbogeflagget blir heisa også på rådhuset. I dette vedtaket er lovverket tolka for snevert, seier Bjørdal, som sjølv også er jurist.
– Til dømes kan kommunestyret vedta støtte til arrangementet eller konkludere med at Bygdepride famnar så breitt at det har allmenn interesse, meiner Bjørdal.
Ørsta kommune held seg inntil vidare på same linje som Volda.
– Vi må halde oss til lovverket om offentlege flaggdagar. Det har ingenting å gjere med mi eiga haldning til Bygdepride, som eg støttar opp om fullt ut, seier ordførar Stein Aam (Sp).
Han ser uansett ikkje vekk frå at Ørsta likevel tillèt regnbogeflagg på rådhuset når saka skal opp i kommunestyret 28. mars.
Framleis omstridd tema
– Flagglova kan tolkast ulikt. Eg veit om fleire saker der ein først har fått avslag, men fått ja seinare, seier leiar i Fri Midt-Norge, Kristin Kulseth.
Ho viser til at fleire og fleire kommunar har vald å heise regnbogeflagget i høve Pride-arrangement.
Men framleis er slike markeringar betente mange stader. Til dømes valde Vennesla i fjor å heise regnbogeflagget, men det var på ei arrangementsstong ved Herredshuset og ikkje på rådhuset.
Faktisk vart regnbogeflagget heisa på Volda rådhus under Bygdepride i fjor, men då etter avtale mellom arrangørane og ordførar Jørgen Amdam (Ap). Og trass i at administrasjonen har sagt nei satsar Amdam på at dei skal få til ei løysing i år også.
– I avslaget Bygdepride har fått er det ein jurist som har gjort vurderinga. Dette skal vi ta ein ny runde på, varslar ordføraren.