Men viss det no blir frost er det fare for frukthausten. Fruktblomstring er ikkje eit normalt syn på denne tida av året. Blomstringa startar vanlegvis i mai når temperaturane står høgare på gradestokken.
I fruktbygda Linge i Norddal kommune er fruktdyrkaren Sigurd Linge i gong med å kviste plommetre. Han har over 1000 frukttre på garden sin.
Knoppane skyt fart
Kvisting er ikkje uvanleg på denne tida av året, men bonden ser er at dei høge temperaturane har gjort at knoppane skyt fart.
– Viss det held fram med dei same høge temperaturane så kan blomstringa kome for langt i forhold til årstida. Eg trur at det vil kome frost etter kvart, seier Linge.
- Les også:
Kan øydeleggje for frukta
Fruktdyrkaren har 75 dekar med eple-, plomme-, morelle- og pæretre. Mykje står på spel for ein som lever av å dyrke frukt.
– Eg fryktar tidleg blomstring fordi fruktblomen ikkje vert bestøva skikkeleg. Trea er avhengig av ein viss temperatur for å bli befrukta, seier Linge.
Problemet med fruktblomstring no er at vi ikkje har insekt enda som kan befrukte blomen. Viss blomen ikkje vert bestøva så vil befruktninga bli ufullstendig.
Tidlege vårteikn
Gunnar Aspehjell frå Tafjord seier at bygda har tydlege teikn på vår.
– Naboen min informerte meg om at hekken vår hadde blitt grøn, og det er i alle fall over ei veke sidan. Eg kan ikkje huske at hekken har vorte grøn så tidleg på året, seier Aspehjell.
Den milde våren har gjort at hekken til Gunnar er kledd i store, grøne blad i slutten av februar.