Sjå tv-reportasje:
NVE har fredag formiddag sendt ut flaumvarsel for Møre og Romsdal. Vassføringa har fleire stader nådd nivå rundt 10-20-års flaum. Elva Driva kan få 50-års-flaum i løpet av fredag/laurdag.
Statens vegvesen ber folk lytte til vermeldinga dersom dei skal reise gjennom Romsdalen.
– Elva går ganske stor no. Det er lite å gå på. Dersom elva stig med ein halvmeter er det faretrugande for vegen, seier Per Brandli, overingenør i Statens vegvesen.
– Korleis skal folk forhalde seg til dette?
– Folk må høyre på vermeldinga og på meldingane frå vegmeldingssentralen. Vi informerer vegmeldingssentralen kontinuerleg slik at dei er oppdaterte, seier Brandli.
I store deler landet har det kome ekstremt mykje regn. I Stor-Elvdal blei fleire personar evakuterte frå husa sine. I Nordland blir folk bedne om å sikre verdiane dei har på bakken.
I går gjekk det eit stort jordras like sør for Slettafossen. Ingen personar eller hus blei skadde, med raset var svært omfattande.
– Det kom ned opp mot 500 000 kubikk jord. Det kom også mykje skog ned lia og la seg ned i elva, seier Brandli.
Ein del av skogen ligg no langs elvekanten. Deler av den øydelagde skogen skal ha blitt flytta mange kilometer ned gjennom Romsdalen.
– Raset var sjeldant stort, seier Brandli.
Noko av jordmassane hamna i går på Europavegen. Men dette var så pass lite at bilar og folk kunne passere, og det gjekk rimeleg greitt å rydde vegen.
Jernbaneverket har nå sendt ut melding om at det er stans i togtrafikken mellom Lillehammer og Dombås.