Det går berre éin veg, og det er at det stadig blir færre bøker i skuleopplæringa. Datamaskina er for lengst innkorporert, og elevane er nærmast fullstendig avhengig av PC-en.
– Eg sit eigentleg på dataen frå klokka åtte om morgonen til når eg legg meg. Eg blir ganske lei på skulen, så eg prøver å finne på andre ting.
Det seier Ann-Mari Sæther Sunde. Ho er elev i 2. klasse på Sunndal vidaregåande skule, der ho studerer på Helse- og oppvekstlinja.
Og problemet er tidvis stort. Ein går fort lei på skulen, og med nokre få klikk er ein inne på Facebook eller midt inne i eit kjekkare dataspel.
Gratis vidareutdanning
Bruken av både datamaskiner og nettbrett kan vere svært vanskeleg for ein lærar å kontrollere konstant.
Det vil utdanningsavdelinga i Møre og Romsdal Fylkeskommune gjere noko med.
Dei har starta opp eit vidareutdanningstilbod der lærarar får lære korleis dei skal bli tryggare på den digitale undervisninga.
– Eg trur at eg blir mykje tryggare på meg sjølv i forhold til å vite kva tid eg skal seie «nok er nok, ut av Facebook», seier Ingunn Haugen.
Ho er lærar på Sunndal vidaregåande skule og har byrja på det gratis vidareutdanningstilbodet.
– Strenge reglar i forhold til digital undervisning i klasserommet er alfa og omega, meiner læraren.
Ikkje berre negativt
Ein stor del av problemet er ofte at elevane kan langt meir om det nye innan data.
18-åringar i dag veit korleis både ein ny PC og internett kan brukast til fulle. Det gjer ikkje alltid lærarar i 40-, 50-, og 60-åra.
No håper både fylkeskommune og lærar Haugen at tryggleiken kan kome gjennom kursing.
I tillegg veit ho at sosiale medium kan vere til god nytt i undervisninga.
– Vi har eigne etablerte grupper på Facebook der eg kan nå elevane tvert, avsluttar læraren.
Kva tenkjer du om bruk av PC og internett i skulesystemet?