I dag eig Opplysningsvesenets fond 430 prestebustader rundt om i heile landet. Halvparten av desse er ordinære hus, medan resten er gamle, erværdige prestebustader. Om lag 70 av bustadane ligg no ute for sal, fordi Opplysningsvesenets Fond vil kvitte seg med utgifter. Av dei 50 prestebustadane i Møre og Romsdal eig kommunane 20, medan Opplysningsvesenets Fond eig resten.
LES OGSÅ:
Får ikkje kjøpe
I Møre og Romsdal er det lita interesse blant prestane for å kjøpe prestebustadane. Berre 2–3 prestar har sagt at dei ynskjer kjøpe. Ein av dei er Vidar Rygh, som er sokneprest i Surnadal. Han ynskjer å pusse opp gamle Øye prestegard, men har fått nei.
– Eg og min familie er som dei fleste andre interesserte i å kome oss inn på bustadmarknaden. Vi synest huset er flott med ei god plassering i ei bygd som eg er glad i, seier Rygh.
Kulturhistorisk verdi
Alice Elnes er avdelingsleiar i Møre bispedøme.
Foto: Gunnar Sandvik / NRKSjølv om Opplysningsvesenets fond har mange prestebustader ute for sal, kjem ikkje bustadane med kulturhistorisk verdi ut på marknaden. Øye prestegard har ikkje status som totalt verna, men har likevel ein kulturhistorisk verdi i lågare grad.
– Desse prestebustadane kjem vi ikkje til å selje over natta. Det vil bli ein lang prosess med lokale interesserte, menigheter og bankar, seier Alice Elnes. Ho er avdelingsleiar i Møre bispedøme.
Bispedømet ynskjer at prestane skal bu i desse prestebustadane utan å eige dei. På den måten unngår ein at prestebustadar med kulturhistorisk verdi endar på private hender, dersom presten seier opp stillinga og sel huset.
Håper framleis
Sokneprest Vidar Rygh forstår det, og synest det er trist dersom slike prestebustader kjem i privat eige, men har eit håp om å få kjøpe.
– No har vonbrotet lagt seg etter at eg fekk førebels avslag. Dersom moglegheita kjem og prisen er god nok, så tenker eg at vi kjøper, seier Rygh.
