– Når vi står der i jakkene våre blir folk nysgjerrige, seier Stig Seljeset frå Hornindal med eit smil om munnen.
Den tidlegare trenaren til Fannemel viser stolt fram jakka han brukar når han følgjer sin tidlegare elev rundt om på ulike hopparenaer.
– Dei lurer dei på kven vi er. Vi er mellom fem og ti personar som følgjer Anders fast i utlandet. Når folk får vite at vi har nære relasjonar til Anders, då må vi også skrive autografar. Så tek dei gjerne bilete av oss også, seier Seljeset.
Både nervøs og klar
Sjølv seier Anders Fannemel at han er spent før verdscupen.
– Eg føler meg veldig klar. Eg har vore litt nervøs, særleg då eg begynte å hoppe igjen etter skadeperioden. Eg veit ikkje kva eg kan vente av meg sjølv. Eg trur eg berre må prøve å hoppe bra, så får eg sjå etter kvart kva mål eg skal sette meg, seier han.
Comeback i Russland
Fannemel blei verdsmeister i skiflyging i 2016. Veteranen har vore ute sidan han øydela eit kne sommaren 2019. No gjer han comeback i verdscupen i russiske Nizjnij Tagil helga 20.–21. november.
Landslagstrenar i hopp, Alexander Stöckl seier Fannemel konkurrerte med to andre hopparar om den siste plassen på laget.
– Han har hatt ei god utvikling siste tida, noko som var avgjerande, seier Stöckl.
Har venta på dette
I Hornindal har Sverre Leivdal venta på friskmeldinga av Anders Fannemel, slik at han igjen kan heie på sambygdingen.
– Eg trur Anders kjem tilbake. No er det sju år sidan han vann sin første verdscupsiger nettopp i Nizjnij Tagil. Etter at han øydela kneet måtte han gjennom fleire operasjonar. Han har hatt tolmod til å halde ut. Det blir spennande å følgje med til helga, seier Leivdal.
Både Leivdal og Stig Seljeset er klare på at det ikkje er noko stress å skrive autografar når dei møter opp i jakkene sine.
– Det er heilt enormt. Det viser kor stor interesse det er for hopp utanfor Noregs grenser, ler Seljeset.