Det var i 10.00-tida onsdag at politiet fekk melding om at det hadde skjedd ein eksplosjon i Molde. Eksplosjonen skjedde under graving i samband med rivingsarbeid i eit eldre hus bygd i 1949.
Politiet kan så langt ikkje seie noko om kva som har eksplodert, men smellet skal ha kome frå eit anleggsområde like ved rutebilstasjonen.
– Det er uklart om det framleis er eksplosivar i grunnen, og vi vil undersøke det no. På grunn av dette har vi valt å evakuere både dei som arbeidar på staden og andre personar som var i Storgata, seier Arnstein Nilsen, visepolitimeister i Møre og Romsdal.
Politiet har valt å sperre av eit større område som mellom anna inkluderer rutebilstasjonen og delar av Storgata.
Fleire av dei som jobbar ved butikkar rundt rutebilstasjonen er også evakuerte. Både politi, brannkorps og ambulanse er no på staden.
Skal undersøke området
Nilsen seier at det er for tidleg å seie noko om kor stor eksplosjonen har vore og kva som skal ha skjedd.
– Vi er interessert i å vite om det er meir eksplosivar i grunnen, og vi er litt forsiktige med å uttale oss om kva dette kan vere. Det kan vere eksplosivar frå krigens dagar, men det er foreløpig berre spekulasjonar frå mi side, seier han.
– Kor sikre er de på at det har skjedd ein eksplosjon?
– Eg må vere forsiktig med å uttale meg for sikkert, men det har heilt klart vore ein eksplosjon og sannsynlegvis har det vore eksplosivar, men utover det så er det vanskeleg å seie noko konkret, seier Nilsen.
Politiet kjem til å halde området avsperra til bombegruppa har fått gjort nødvendige undersøkingar. Politiet vil i tillegg avhøyre vitne og undersøke grunnen for å sikre seg at det ikkje blir fleire eksplosjonar.
– Vi vil no gjere undersøkingar med nødvendig kvalifisert personell for å sjå om det er meir eksplosivar i område, seier Nilssen.
Ingen er skadd
Ingen skal vere skadd i eksplosjonen.
– Det er ingen som er skadd eller på anna måte har blitt forulukka, men vi har som sagt sperra av eit større område, og vi ber også folk om å vere forsiktige, halde seg til dei avvisningane politiet gjer og ikkje bryte sperringane, seier Nilssen.
Trafikken til og frå rutebilstasjonen blir no omdirigert.
Vart evakuert
Dei tilsette ved fiskehandlaren Horsgaard & co. i Molde er blant dei som er evakuerte.
– Vi opplevde ikkje situasjonen som dramatisk, men vart overraska då det plutseleg kom veldig mykje politi, seier dagleg leiar Kjell Rune Kirkeland.
Kirkeland og dei andre tilsette er no evakuert til baksida av butikken.
– Politiet har sperra av eit stort område, fortel han.