Erik er ein av sunnmøres sterkaste menn

Erik Røen frå Ørskog er ein av styrkeløftarane som er i aksjon. For første gong arrangerer Fræna Atletklubb internasjonalt meisterskap for ungdom og junior, og Røen er ein av favorittane. Fredag ettermiddag løfta han 185 kilo i benken.

– Ja, det heldt, jubla han fornøgd like etterpå.

Verdsrekordar på løpande band

185 kilo svarar til to velvaksne menn, og er ei vekt dei færraste klarer å hamle opp med. Men Røen er ikkje åleine om å løfte tungt i Fræna denne helga. Her set dei rekordar på løpande band.

– Det er kjempemoro å få ein slik konkurranse i Fræna, det er vår første internasjonale konkurranse, og vi har vore vitne til mange europa- og verdsrekordar sidan starten av stemnet, seier Ralf Male, som er med og arrangerer meisterskapet.

Les også:

• Har fem år på å bli den sterkaste i Noreg
• Ser at all treningen gir resultat

100 styrkeløftarar frå inn- og utland

Over 100 styrkeløftarar frå Sverige, Danmark, Finnland, Island og Noreg er på plass i Fræna denne helga.

Svenske Emil Nordling er ein av dei som likar å løfte tungt, og fredag ettermiddag var han ikkje i tvil om at han skulle slå dei norske.

– Det er kult å løfte tungt, eg har alltid vore sterk, det er herleg.

– Men klarer du å ta dei barske nordmennene?

– Dei tek eg, det er ingen problem, sa svensken.

Kort tid etter måtte han gje seg. Men han har både laurdag og søndag til å ta revansje.