59 minutt og 40 sekund brukte Johan Bugge frå Eidsvåg i Romsdal på dei 1100 metra rett opp i fjellsida i VM i Cassetta di Massa i Italia. Det plasserte 23-åringen på ein 23. plass av 157.
– Eg var nær å kome på topp 20. lista. Det gjekk ikkje, men eg er nøgd likevel, fortel Bugge.
LES OGSÅ:
Han er best på korte distansar, men trefte bra med farta og rytmen oppover det bratte fjellet. Å springe ein time er krevjande og dagens løp er eit av dei beste han har gjort på lengre distansar.
Utdanna elektrikar
23-åringen jobbar på heiltid som elektrikar ved Elmo teknikk i Molde. Trass mykje jobb får han tid til ni treningsøkter i veka. Fire i helgene og ei økt kvar dag etter jobb. Han ynskjer å auke treningsmengda og har fått avtale om å få meir fri før han skal springe motbakkeløp.
Skal vinne
Om to veker er det motbakkeløpet Oslos brattaste som står for tur. Det løpet har han vunne dei to siste åra.
– Då er det berre siger som gjeld, seier Bugge.
Å drive med idrett på heiltid har han ingen planar om. Motbakkeløp spring han fordi det er artig. Tysdag er han tilbake i elektrikarjobben.
