Det byrjar å verte grønt i Geiranger og grønare kan det verte, for no har bygda fått fleire nye el-bilar til turistane.
Grønt til turistane
No satsar selskapet eMobility Geiranger på at el-bilane kan gi heilårlege arbeidsplassar og at det skal verte enklare for turistane å kome seg rundt i bygda og opp på utkiksplassane.
– Desse små, rare køyretya skal vi leige ut til turistane og dei får også med seg audioguiding, seier dagleg leiar Tomas Bakken.
Ein får ein følelese av å køyre go-kart når ein manøvrerer den vesle el-bilen oppover svingane i Geiranger.
– Bilen er litt stiv, men han ligg godt på vegen, fortel Bakken fornøgd idet han prøvekøyrer nysatsinga.
Miljøvennleg
Håpet med el-bilane er at verdsarven kan framstå meir miljøvennleg.
– Utan at vi skal prøve å frelse verken oss sjølve eller andre, så prøver vi å gjere ein liten del for miljøet.
Ove Skylstad, som er dagleg leiar i destinasjon Geirangerfjord-Trollstigen, trur tilbodet kjem til å slå an hos turistane.
– Dette er eit artig nytt tilskot. Eg trur dette kan vekkje interesse!