Det var like etter klokka 18.30 at Sunnmøre politidistrikt melde at ei yngre jente og den oppblåsbare gummibåten ho sat i dreiv ut frå land ved Tueneset i Ålesund.
– Vi var på veg tilbake frå eit oppdrag då politiet bad oss om assistanse, seier Bjørn Fladmark på redningsskøyta Norske Veritas 2.
– Jenta hadde leika seg ved stranda og padla rundt i sjøen då vinden fekk tak i henne og båten, held han fram.
– Bruk redningsvest
Sterk vind førte henne lenger ut på sjøen, før redningsskøyta var på plass å fekk henta henne om bord.
– Ho var kald og forkomen. Vi fekk gitt henne noko å varme seg på, og køyrde henne så tilbake til land, seier Fladmark.
Jente hadde ikkje på seg redningsvest, og Fladmark meiner det er noko av det viktigaste å huske på, sjølv i små båtar.
– Bruk redningsvest! Eg kan ikkje få sagt det nok.