Drar til sjøs i sommarferien

På Sørneset i Ålesund arrangerer Redningsselskapet sommarleir. 27 barn er samla for å lære om sjø og båt.

– Det er spennande å lære noko nytt, seier 11-åringen Mathea Soma Nordstrand.

Venninna Agnes Aambakk Frisvold var med også i fjor. Det var så kjekt at ho ville vere med også i år.

Ho er ikkje opptatt av å kvile seg i sommarferien:

– Eg likar å gjere ting. Avslapping er ikkje noko for meg.

Ylva Ørnhaug er ein av fleire unge instruktørar frå Redningsselskapet som er i aksjon på Sørneset i Ålesund.

– Redningsselskapet har ein visjon om at ingen skal omkomme på sjøen. Då er det fint at barna får lære korleis dei skal oppføre seg i båt, seier ho.

• ​Les også: Vestpåbudet skapte bråk, men sjekk nå

Når NRK er på besøk har barna ei konkurranse, der dei skal gjere ei segljolle klar så fort som råd. Kajakkane kjem på vatnet, og nokre er ute med motorbåt.

Kaotiske måndagar

– Men på første måndagen i sommarferien er det kanskje ikkje alle som er like motiverte?

– Det er alltid litt kaotisk på måndagane. Men det går seg fint til etter kvart, seier Ylva Ørnhaug.

11-åringen Agnes Aambakk Frisvold stadfestar at nokre av barna er litt slappe denne dagen:

– Nokre går og gjespar litt. Men det går nok betre utover i veka!