Midt i hamna i Kristiansund, blei vesle Liv (1) historisk då ho i dag blei den første til å bli døypt om bord i passasjerbåten Sundbåten i Kristiansund.
– Det var veldig nydeleg og flott, skikkeleg noregsreklame, seier mor Sylvia Stokke.
For sjølv om kyrkja berre ligg eit steinkast unna, bad dei prosten pent om å få bruke båten som vanlegvis fraktar kristiansundarane rundt til dei ulike bydelane.
– I denne tida har hjartet baka ekstra hardt for det nære og ein har fått forsterka lokalkjensla. Vi sett meir pris på dei tinga vi kanskje har tatt litt for gitt, seier Stokke.
– Fekk ikkje plass til kyrkjeorgelet
Det var prost i Ytre Nordmøre prosti, Sindre Stabell Kulø, som sto for den uvanlege dåpen ute på dekk på Sundbåten laurdag. Under ein skiftande himmel velsigna han Liv Stokke Bruset (1), som sat på armen til mor si.
– Vi tok med døypefonten og dåpsvatnet, men kyrkjeorgelet fekk ikkje vi plass til, seier Kulø lattermild.
Pandemien har ført til meir fleksibilitet
Dei siste åra har mange flytta bryllaupsseremoniane ut av kyrkjeromma og rådhusa.
Kulø fortel at dei rett som det er døyper barn ute i friluftsgudstenester, men at dette er første gong han har gjennomført ein dåp om bord i ein båt.
– Vi ønskjer ikkje ein trend der dåpen skjer mest mogleg utanfor kyrkjerommet, men samtidig har pandemien synleggjort at det let seg gjere. Vi prøver å strekke oss langt for å seie ja, men må gjere vurderingar i kvart enkelt tilfelle, seier Kulø.
Ikkje minst har det vore viktig under pandemien med stadige endringar rundt kor mange som kan møte opp. Små dåpsgudstenester har blitt meir vanleg.
Invitert til konfirmasjon same stad
Det var ingen baby som blei boren til dåpen laurdag, men ein eittåring kledd i bunad, slik som foreldra. Dåpsbarnet fekk æresmedlemskap i Sundbåtvesenet og invitasjon til å gjennomføre også konfirmasjonen på passasjerbåten, når den tid kjem.
Familien er glad for at dagen blei heilt spesiell.
– Slik blei det ekstra minneverdig, sjølv om vi ikkje kunne samle alt av slekt og vennar, fortel ho.