Mannen som døydde søndag var mannskap på ein av to russiske båtar som er inne til reparasjon ved Fiskerstrand Verft i Sula..
– Ulykka skjedde på fritida. Russarane har jo ein annan kalender, og i helga hadde dei julefeiring. Mannskapa på dei to båtane besøkte kvarandre, seier HR-leiar Elise Gjermundrød ved Fiskerstrand Verft.
– Er det grunn til å tru at det kan ha vore alkohol inne i bildet her?
– Det kan eg ikkje spekulere i. Vi får vente og sjå kva som kjem fram i politiet si etterforsking.
– Dette er noko som går inn på oss. Vi har eit svært godt samarbeid med dei russiske båtane og reiarlaga, seier Elise Gjermundrød.
– Ingen såg kva som sjedde
Ifølge HR-direktøren var ingen andre i nærleiken då mannen fall ned frå dokka på verftet.
Ho seier det er heilt vanleg at mannskap bur og søv om bord i båtar som er på reparasjon.
– Men kan det ikkje vere ein tryggleiksrisiko knytt til at så mange bur og lever om bord på båtane?
– Det har gått bra i alle år. Det går bra når ein følger dei reglane som finst, seier HR-leiar Elise Gjermundrød ved Fiskerstrand Verft.
Verftet hjelper politiet
Ho seier verftet vil gjere det dei kan for å hjelpe politiet med å finne ut kva som skjedde då mannen døydde søndag.