Denne mannen utfordrar Telenor og Telia

Hopp til innhold

Ålesundsmannen Christian Pritchard har ikkje akkurat dårleg sjølvtillit. No går han ut og seier at han vil ta marknadsdelar frå Telenor og Telia i bedriftsmarknaden.

Minibedrift mot megakjemper

Nortel er eit miniselskap. I kunnskapsparken i Ålesund har dei bygd opp ein organisasjon på rekordfart. Sunnmørske investorar er med på laget.

Frå fleire hald blir det hevda at Telenor og Telia treng konkurranse. NRK fortalde nyleg at nordmenn betaler meir for samtalar utanfor EU enn svenskar og danskar.

Styresmaktene er glade for at små aktørar vil gå til kamp mot dei to storkonserna.

– Utfordrarar er bra, særleg i bedriftsmarknaden. Der er ikkje konkurransen god nok, seier Elisabeth Aarsæther. Ho er direktør i NKOM, den nasjonale kommunikasjonsstyresmakta.

– Dei små aktørane bygger ofte opp nye og billegare tenester. Vi får dermed betre konkurranse, seier NKOM-direktøren.

Satsar for andre gong

Gründeren Christian Pritchard bygde på 2000-talet opp Mobitalk, eit telekomselskap som vart selt til Phonero i 2016. Året etter vart Phonero selt til Telia for 2,3 milliardar kroner.

No er det andre gongen Pritchard utfordrar gigantane. Når NRK kjem inn i lokala sit han saman med kollegaer rundt eit bord og diskuterer strategien. Dei skal kapre så mange som råd av 73 000 aktuelle bedriftskundar rundt om i heile landet.

Han er ikkje med på at det er vel optimistisk å tru at dei skal konkurrere med dei to store frå nokre små kontorlokale i Ålesund.

– I dag må vi tenke stort om vi skal vinne. Vi går inn i ein veldig traust marknad. Målet er å skape utvikling i ein bransje som verkeleg treng det, seier 45-åringen.