Folk har høyrt Nils Nordberg i NRK radio i ein mannsalder, men først no trer han ut på scena igjen. Det skjedde ein gong for 45 år sidan, då fann han ut at han ikkje ville bli skodespelar.
- Eg har vel blitt så gamal og dum at eg tør igjen. Eg trur eg skal klare det, det var rett og slett for freistande, seier den kjende radio-regissøren.
På scena i 8 dagar
I åtte dagar skal Nordberg spele "Solve Skald" i "Fru Guri av Edøy" på Smøla. Middelalderspelet foregår på øya Smøla på Nordmøre, og handlar mellom anna om sterke kvinner som kjempar mot makta. I 2010 er det 20 år sidan spelet blei framført for første gong, etter at Peggy Kristine Kruse skreiv eit tablå i samband med 800-års-jubileumet ti Edøy gamle kyrkje.
Les også:
- Som ein bestefar
Monica Aure, som spelar "Bergljot" har allereie fått eit nært forhold til den kjende regissøren.
- Han er nesten som ein bestefar for meg. Han har lært meg å slå hjul og slikt, seier ho.
Norges fremste på krim
Nils Nordberg er landets fremste spesialist på krimlitteratur og instruktør i Radioteatret. Han er 68 år gamal og har sett opp over 120 høyrespel i NRK, dei fleste krim eller sience fiction-produksjonar.
Fornøgd regissør
Regissør Line Rosvoll syns det er flott å ha med ein røynd radiomann.
- Det er stader der eg forsøkjer å dirigere tre hestar og 70 fotfolk og amatørar, då er det veldig greit å ha med nokon som kan gjere jobben sin utan at eg held dei i handa, seier Rosvoll.
Torsdag kveld er det premiere.