Konkurrerer om å brenne Noregs beste kaffi

Når eigarane av Jacu i Ålesund deltar i noregsmeisterskap i kaffibrenning så er det på eit høgt teknisk nivå. – Brenning handlar mykje om måleinstrument og ein del kjemi, og det kjennest litt nerdete ut når du er så opptatt av det, seier Oliver Hanken.

NM i kaffebrenning

Oliver Hanken og Gunnar Lillevold konkurrerer i NM i kaffibrenning denne helga.

Foto: Oliver Hanken
NM i kaffebrenning

Kvar kaffibrennar får delt ut ein type kaffibønner dei ikkje veit noko om, og så skal dei brenne desse. Dommarar avgjer kva kaffibrennar som har brent kaffien på den beste måten.

Foto: Oliver Hanken

– Det handlar om smak, om å forstå kaffibrenning, om å forstå kva som utviklar smak, seier Oliver Hanken.

Hanken har vore kaffibrennar sidan 2011 då han starta kaffibrenneriet Jacu i Ålesund saman med kona Anne Birte Bjørdal Hanken og Gunnar Lillevold.

– Det er kjempelærerikt å vera med på NM. Det er då me treff våre kollegaer, nokon med svært mykje erfaring og andre med mindre. Det er veldig delekultur, og det er veldig kult, seier Hanken.

Har fått pallplass før

Gunnar Lillevold

Gunnar Lillevold har pallplass frå NM i kaffibrenning frå før. Det første året det vart arrangert NM fekk Lillevold tredjeplass.

Foto: Oliver Hanken

I år er det den tredje gongen Speciality Coffee Association Europe Norge (SCAE-Norge) arranger noregsmeisterskap i kaffibrenning.

NM i kaffibrenning er ope for alle kaffibrenneri, og då konkurransen vart arrangert første gong i 2013 fekk Gunnar Lillevold ein tredjeplass for Jacu.

– Det var 14 kaffibrenneri som deltok i fjor, og i år er det sju. Det er ein komplisert konkurranse og du skal vera veldig innstilt på kva du gjer, seier Oliver Hanken.

Konkurransen føregår i Solberg & Hansen sine lokale på Ryen i Oslo, og det er difor ikkje publikum til stades. Den som vinn får reise til VM i kaffibrenning i Göteborg, og det er eit høgt press også i NM.

– Det er faktisk slik at eg blir veldig nervøs. Det er så veldig små marginar på kva som gjer brenninga bra og kva som gjer den mindre bra. Dei som deltar har jobba lenge med dette, og no skal me testast, seier Hanken.

– Veldig teknisk

Noregsmeisterskapet i kaffibrenning går over tre dagar. Første dagen får kvar kaffibrennar delt ut 300 gram av ein sort kaffibønner som dei ikkje veit noko om på førehand.

– Det er ein veldig teknisk konkurranse, så me fortel litt om kor store bønnene er, kva fuktnivået er, og vekta av kaffibønnene, seier Oliver Hanken.

NM i kaffebrenning

Prøvebrenning og nøye planlegging må til før dag to med produksjonsbrenning.

Foto: Oliver Hanken

Kaffibrennarane prøver å identifisere kvar kaffibønnene kjem frå, og så får dei prøvebrenne. Målet er då å lage tre forskjellige profilar ut frå dei kaffibønnene dei har fått delt ut.

– Det som kan gjere forskjellen på profilane er til dømes temperatur og luft. Når ein brenn dei så har ein mange forskjellige fasar som kan påverke smaken, til dømes «maillard-fasen», der sukker utviklar seg frå brunt sukker til honningsukker, seier Hanken.

Får poeng

Den andre dagen i NM er det klart for produksjonsbrenning. Då har kaffibrennarane smakt på prøvebrenninga, og to parti på ti kilogram kvar skal brennast.

Kaffibrennarane skal på førehand bestemme korleis kaffien skal smake når den er ferdigbrent. Dei må skrive ned nøyaktig korleis, kor lenge, og på kva temperatur kaffien skal brennast. Dei må også skrive ned kva vekt sluttproduktet skal ha.

Den tredje dagen er dommarane på plass, smakar, og gir poeng. Den som har funne den beste måten å brenne på vinn.

– Det er der det er interessant fordi viss eg seier dette skal smake honning, kvit te og sjokolade, og det ikkje gjer det, så kan eg ikkje faget mitt. Då blir det trekk, seier Hanken.

Vinnaren av NM i kaffibrenning blir annonsert på Mathallen i Oslo sundag 7. juni.

Gunnar Lillevold

I lokala til Solberg & Hansen i Oslo er det ikkje plass til publikum, men det er høgt press for kaffibrennarane likevel.

Foto: Oliver Hanken

Siste video/lyd

Dei tre siste åra har meir enn 450 alvorleg psykisk sjuke kome seg inn i arbeidslivet.
Dette skjer etter eit aktivt samarbeid mellom NAV og helsevesenet.
Ein ny forskingsrapport viser at pasientane blir friskare av å jobbe.
Ein rakett er kanskje det som skal til for å gjere skuleelevar interesserte i naturfag. 
Elevar på Gjermundnes i Vestnes har utvikla ein rakett som skal få barn og unge til å bli i fyr og flamme.
Nokre som er glade i å boltre seg på kjøkenet er elevane ved Borgund vidaregåande i Ålesund. Dei elskar å bake - og å smake.