Delar av Nordøyvegen opnar i desember neste år

Hopp til innhold

Nordøyvegen skal etter planen stå ferdig sommaren 2022, men no er det klart at delar av vegprosjektet kan opne allereie i desember 2021. Dette betyr at brua frå fastlandet til Lepsøya og den undersjøiske tunnelen vidare til Haramsøya blir opna for trafikk tidlegare enn planlagt.

– Dette må vere tidenes julegåve for øyfolket, seier fylkesordførar Tove Lise Torve (Ap) til NRK.

Det blir ikkje bompengebetaling før heile Nordøyvegen opnar i 2022. Fram til da køyrer trafikantane gratis.

Glade øybuarar

Éin av dei som jublar over den framskunda opninga, er Synnøve Farstad Standal, som flytta på Haramsøya i 2017.

– Det er veldig gode nyhende å høyre at delar av Nordøyvegen vil opne allereie til neste jul, seier ho til NRK.

Ho jobbar i barnehagen på naboøya Lepsøya og brukar i dag om lag 1,5 time til og frå jobb kvar dag, inkludert venting og reisetid med ferja.

– Dette vil lette kvardagen min ein god del, sidan eg brukar så mykje tid på å pendle.

Anne Breiby seier det er stor glede også på Lepsøya over den overraskande framskundinga.

– Det er fantastisk at vi kan køyre ferjefritt om berre eitt år. Eg trur det kjem til å bli fleire som byggjer hus der no, seier ho.

Bompengeinnkrevjing

Avtalen mellom Møre og Romsdal fylkeskommune og utbyggjaren Skanska endrar ikkje opningstidspunktet for resten av vegprosjektet. Planen er fortsatt at heile Nordøyvegen opnar for trafikk sommaren 2022. Samarbeidet mellom fylkeskommunen og Skanska har vore godt.

– Vi har jobba saman med å sjå på korleis vi kan optimalisere gjennomføringa av Nordøyvegen heilt sidan vi signerte kontrakten i desember 2018, seier prosjektleiar Marianne Nærø.

Nordøyvegen skal delvis finansierast gjennom bompengeinnkrevjing på Skjeltene på fastlandssida. Mellom øyane skal det vere gratis å køyre.

Fakta om Nordøyvegen

Nordøyvegen er eit fylkesvegprosjekt som skal gi fast vegsamband mellom øyane Lepsøya, Haramsøya, Flemsøy/Skuløy, Fjørtofta og Harøya (Nordøyane) i Ålesund.
Prosjektet vil gi fastlandssamband for rundt 2700 menneske.
Prosjektet inneber bygging av tre undersjøiske tunnelar, ein miljøtunnel og til saman tre bruer. Den lengste tunnelen blir på 5730 meter og skal gå over Nogvafjorden.
Nordøyvegen har som mål å betre konkurranseevna til næringslivet på øyane, og gjere Nordøyane til eit meir attraktivt område for busetting og næringsaktivitet.
Nordøyvegen var først kostnadsrekna til ca. 3.8 milliardar kroner, men har no ei ramme på 4,9 milliardar kroner. Fylkesrådmann Ottar Brage Guttelvik meiner prisen vert 5,6 milliarder kroner.
Dei tidlegare kommunane Haram og Sandøy har saman med næringslivet bidrege i finansieringa.
Midlar fylkeskommunen bruker til å drifte ferjene, går inn i prosjektet.
Det er vidare berekna at brukarane av sambandet skal betale ca. 400 millionar i bompengar.
Selskapet Nordøyvegen AS vart oppretta av tidlegare Haram kommune (43,29 %) og Sandøy kommune (41,54 %), i tillegg til mange småaksjonærar.
Etter kommunesamanslåinga ligg heile prosjektet no i Ålesund kommune.

(Kjelde: Statens vegvesen/Nordøyvegen AS)

Samband til 4,9 milliardar kroner

Bygginga av Nordøyvegen med ein totalkostnad på 4,9 milliardar kroner, har vore omstridt og blei vedtatt i fylkestinget i desember 2018 etter mange utsettingar og ein hard politisk kamp.

Både fylkeskommunedirektøren og eit stort politisk mindretal i fylkestinget meinte fylkeskommunen ikkje hadde økonomisk råd til å byggje vegen som gir fastlandssamband til 2700 innbyggjarar.

– Folk har kjempa lenge for å få vegen. Dei fekk fleirtal i fylkestinget. No ser det ut til å gå mykje betre med finansieringa og i tillegg så blir delar av vegen opna tidlegare. Dette er fantastisk, sier fylkesordførar Tove Lise Torve (Ap).