I strålande solskin er Marianne Dyb Valkve på veg ned frå ein av sine nesten daglege turar på Godøyfjellet på Giske. Ho har gått her i mange år, og har sett at stien forandrar seg.
Talet på folk som går her har auka mykje siste åra.
– Det gjer at stiane blir breiare og breiare. Folk lager stadig nye stiar for å unngå å trakke i gjørme. Det er bra at nokon tar grep, seier ho.
Litt lenger ned i stien står det to sekkar med stein. Friluftsgruppa i Godøy idrettslag har flydd opp 26 tonn med stein som er plassert rundt om på fjellet. Pengane til å gjere dette har andre på øya hatt dugnad for å få inn.
– No må vi bli einige om korleis vi skal leggje desse for at det skal bli best mogleg, seier Jan Ove Skodje.
Mykje blir gjort på Dugnad
På ein 3.5 kilometer lang sti som går langs foten av fjellet trivest fire av dei ivrigaste dugnadskarane aller best. På turstien som friluftsgruppa til Godøy Idrettslag har gjort kan dei gå og preike om nye prosjekt dei er i gang med.
– Eg skada meg litt då eg heldt på å leggje utover stein opp i her. Så trur ikkje eg skal bli med opp på fjellet i dag, seier Åsmund Eilertsen. Men han har nok å styre med også ved foten av fjellet.
– På denne brua skal det snart komme både troll og bukkane bruse seier han, og viser eit av sine nyaste prosjekt.
Litt lenger nede har han bygd ein huk der store og små kan kose seg.
– Det å sjå lyset i auga til barn som er glade er nok det som motiverer meg aller mest, seier han.
God tilrettelegging for at folk skal bruke fjella har dei og sett har sin pris. 15 000 skreiv seg inn i bøkene på Godøyfjellet i 2016, men det er det er det slettes ikkje alle som gjer. Så talet på kor mange som går på fjellet her er det ingen som veit.
– Vi har i alle fall sett at stiane no er i ferd med å bli så øydelagde oppe på fjellet at noko må gjerast. Inngrepet i naturen er større om vi ikkje gjer det, seier Hans Petter Godø.
Nødvendig med tiltak
Det er ikkje berre på Godøya at det er nødvendig med tiltak. Damene frå Hessa i Ålesund som er på veg ned frå Godøyfjellet seier det er enda verre på fjellet Sukkertoppen nær der dei bur.
– Ja, der burde i alle fall noko bli gjort, seier Anne Hovland.
– Men det er viktig å ikkje leggje til rette for mykje. Kvar tur må ha sitt særpreg, og det skal vere litt krevjande å gå somme plassar. Det er det som gjer det spennande, seier ho.
Ser mykje slitasje
Stikk UT prosjektet til Sunnmøre friluftsråd har fått mange fleire ut på tur, og mange samlar poeng på ulike fjell gjennom prosjektet.
Leiar May Britt Haukås er glad for suksessen, men ser at dei mest brukte og mest bynære stiane har blitt veldig slitne.
– Eg er veldig imponert over den dugnaden på Godøya, og skulle gjerne sett at fleire blir inspirert av den, seier ho.
– Vi tilretteleggjar for friluftsliv, men utan frivillige så hadde det vore smått stell.