Dårleg sommarvêr skaper krangling

Tåka heng langt nedi fjella i Ålesund og nok ein dag regnar det. Leikeplassen i byparken er tom for barn. I dei populære trappene opp til utkikspunktet Aksla trassar enkelte folk vêret. To av dei er ekteparet Heidi og Arve Vange frå Bergen.

– Eg synest vêret er litt deprimerande, for du ser fram til sommar og sol, seier Heidi Vange med hetta tredd godt over hovudet for å ikkje bli våt.

LES OGSÅ:

• Juni var kald for alle
• – Fantastiske skiforhold i sommer

For store forventningar

Og akkurat det med store forventingar til korleis ferien skal bli, gjer at humøret kan bli dårleg når sommaren ikkje innfrir, trur Andreas Høstmælingen. Han er fagsjef i Norsk psykologforeining. Psykologen trur ikkje det dårlege sommarvêret gir langtidsverknader, men det kan vere krevjande for familiar som har ferie.

– Er vêret dårleg, blir ein sittande meir inne og får brakkefeber. Mange går kanskje kvarandre på nervane og blir irriterte, seier Høstmelingen.

Ofte lever familiar på tur også langt trongare enn heime.

– Når folk vert sittande inne på eit lite areal og ikkje finn på noko å gjere, er det lett

å starte ein krangel, trur Høstmælingen.

Pakk regntøy

Hans beste tips er å ta høgde for dårleg vêr når ein pakkar til ferietur, slik at barna slepp å sitje inne og sjå den same filmen hundre gongar. Ta med regntøy og støvlar. Det å prata saman om forventingar ein har til ferien, er også lurt.

– Planlegg aktivitetar som passar i dårleg ver. Nordmenn er jo vanlegvis godt kledde for dårleg ver, og vi er vande med det. Det er dei store forventingane vi plutseleg har til sommaren som er øydeleggande, seier Høstmælingen.

Blir irritert

Familien Kjæmpenes frå Alta har noregsferie og let ikkje regnet i Ålesund øydelegge stemninga totalt.

– Eg blir litt irritert på vêret når sola og varmen ikkje kjem. Det er jo det eg har gledd meg til, seier Oda Belikka Kjæmenes.

Klimaforskar Jostein Mamen trur at den usedvanleg varme sommaren i fjor, gjer at folk trur at årets sommar er svært dårleg.

– Dei tørre tala viser at det har vore kjøligare enn normalt, men det har vore kjøligare tidlegare. Ein kan ikkje bu i Noreg utan å ta høgde for dårleg vêr, seier Mamen. Denne veka er det meldt vekslande og ustabilt ver, og altså ingen betring i sommarvêret.