Kvart år lagar Fylkesmannen til ei oversikt over kommuneøkonomien. Målet er å gje eit overblikk over korleis det står til.
– Oversikta kan folkevalte eller innbyggjarane i kommunene bruke. I tillegg er det ei tilbakemelding til Oslo om korleis det ligg an ute i kommune-Noreg, seier Mortensen, som er rådgjevar hjå Fylkesmannen i Møre og Romsdal.
Av kommunane i fylket er det Aukra som kjem best ut, medan Stranda har desidert høgast gjeld i landet.
- Sjå oversikt over kommunane si lånegjeld og driftsinntekter i tabellen nederst i artikkelen.
Aukra på topp
– Hovudgrunnen til at me ligg godt an, er eigedomsskatten frå Nyhamna og Ormen Lange, seier Bernhard Riksfjord. Han er ordførar i Aukra for Arbeidarpartiet.
Han er klar over at dei kjem godt ut, og seier til NRK at kommunen i lenger tid har hatt eit høgt driftsnivå. I tillegg har dei høge nok inntekter til at dei kan investere i kommunale bygg.
– Me prøver å vere nøkterne, og halde nivået på investeringar og drift på eit nivå som gjer at me kan sjå oss i spegelen om mange år, seier Riksfjord.
Dårleg snitt
Det er det kanskje ikkje alle som kan. For medan Aukra er i landstoppen, ligg åtte kommunar i Møre og Romsdal på Robek-lista (Les meir om Robek til høgre i artikkelen).
– Det er om lag det dobbelte av landsgjennomsnittet, seier Mortensen ved Fylkesmannen.
Han peiker på at kommunane ikkje har vore flinke nok til å omstille tenestene sine når det trengst.
- Me bruker for mykje pengar, så enkelt er det. Me greier ikkje å omstille tenesteproduksjonen godt nok når rekneskapen byrjar vise underskot.
På gjeldstoppen ligg Stranda kommune, som har ei gjeld som er nær det firedoble av landsnittet, fortel Mortensen.
- LES OGSÅ:
Ikkje heilsvart
Dei kommunane som i dag har økonomiske vanskar, vil også i åra som kjem, trur Mortensen.
– Mange kommunar vil få utfordringar når renta går opp, trur han.
I tillegg er det sagt at kommunar må stramme inn for å unngå påverknad frå den internasjonale finansuroen. Likevel er det ikkje heilsvart i kommunane.
– Me må håpe på at dei kan finne løysingar som gjer at dei kan halde kvaliteten oppe, og halde seg innanfor dei økonomiske rammene, seier han.