Damene er ofte gåvesjefen: – Ho kjøper alle

Julegåver er med på å halde relasjonar ved like. Sjølv om samfunnet har blitt meir likestilt, er det i stor grad kvinnene som tar styringa når presangane blir kjøpt inn.

Ekteparet Hveding på handletur i Kristiansund

Hos ekteparet Hveding er det frua som handlar alle julegåvene. – Vi har ein stor familie med fire barn og barnebarn, men det er ein hyggeleg jobb, seier Solveig Hveding.

Foto: Marius André Jenssen Stenberg / NRK

– Det er kona som står for all julegåvehandelen, sånn er det, seier John Hveding.

Han er på handletur i Kristiansund. Men sjølv står han utanfor butikken, mens hans betre halvdel gjer seg ferdig inne.

– Damene er flinkare veit du, dei veit kva folk ønsker seg, seier Hveding.

– Kva hadde skjedd om du stod for gåveinnkjøpet?

– Nei det hadde ikkje gått bra. Då hadde dei truleg fått noko dei ikkje ønsker seg.

Kvinner kjøper fleire gåver

Sosiolog Anita Borch ved Oslomet har forska på juletradisjonar og gåver. Ho stadfestar at det i stor grad er damene som har hovudansvaret for julegåvehandlinga.

– I jula så er det tradisjonelle kjønnsrollemønster som gjeld. Vi pakkar det ned med julepynten, og pakkar det fram igjen til jul, seier Borch.

Forbruksforsker Anita Borch

Sosiolog Anita Borch forskar ved universitetet Oslomet.

Foto: Emrah Senel / NRK

Kvinner gir gåver til fleire ulike type mottakarar enn menn, ifølge ei undersøking dei gjorde i 2018. Slik som til andre vaksne slektningar, andre sine barn, venner, kollegaer og kjæledyr.

Altså relasjonar ein i mindre grad er forventa å gje gåver til.

– Kvinner kjøper mange fleire gåver enn menn, og dei startar også mykje tidlegare på året. Dei har stort sett ansvaret for juleførebuingane, fortel Borch.

Julegavehandling i Kristiansund. Alti Storkaia kjøpesenter

96 prosent av nordmenn gir bort minst éi julegåve, ifølge ei Oslomet-undersøking frå 2018. Kvinner gir likevel bort langt fleire.

Foto: Marius André Jenssen Stenberg / NRK

Ho forklarar at å gje julegåver tradisjonelt har blitt sett på som ein type omsorgsarbeid, i tillegg til at mykje handlar om å bevare band til slekta. Tradisjonelt sett har dette vore noko kvinner har tatt meir ansvar for.

– Overraskar dette deg som sosiolog, at dette står så sterkt i 2021?

– Eigentleg ikkje. Ein god jul er ein tradisjonell jul, derfor gjer vi omtrent som vi har pleid å gjere. Då går utviklinga seint, seier Borch.

Eit ansvar for begge

For Thor Martin og Sunniva Hegglum i 20-åra er det koseleg å samarbeide om handlinga, og det gjer dei i stor grad.

– For meg er det heilt naturleg at det er eit ansvar som ligg på begge i dagens samfunn, seier Thor Martin Hegglum.

Sunniva og Thor Martin Hegglum.

Sunniva og Thor Martin Heglum er på handletur på Storkaia kjøpesenter i Kristiansund.

Foto: Marius André Jenssen Stenberg / NRK

Kjønnsroller endrar seg i takt med generasjonsskifte. Det trur forskaren også gjeld for gåveinnkjøp.

– Menn har fått ein større symbolsk kompetanse og veit kva ting betyr. Dermed kjenner dei seg tryggare i julegåvehandel, seier Anita Borch.

Thor Martin trur likevel kona tar eit litt større ansvar enn han, noko Sunniva også gjer innanfor si eiga familie.

– Han har søstrer som hjelper han litt. Mens eg har tre brør, og då er det ofte eg som kjøper gåve til mamma og pappa, så vippsar dei då, seier Sunniva Hegglum.