Dersom Tromsdalen hadde utlikna til 3–3 mot Alta, hadde Hødd spelt 2. divisjon neste år.
Og både trenarar og spelarar i Hødd har sagt at cupfinale mot Tromsø hadde blitt ein nedtur dersom plassen ikkje blei sikra.
Men Tromsdalen scora aldri, og Alta vann 3–2. Dermed sikra Hødd plassen trass i det flaue 4-0-tapet i Bodø.
Like fullt er Hødd klare for 1. divisjon 2013. Det gjer at cupfinalen kan møtast med gode tankar.
– Det blir ein fest
For Pål André Helland, éin av Hødd sine viktigaste spelarar i år, er det godt å endeleg kunne puste ut.
– No kan vi glede oss til cupfinalen.
– Tidlegare har fokuset vore på å halde plassen, med tanken om at cupfinalen kjem når den kjem, fortel Helland.
No er derimot alle tankane samla.
– No har vi berga plassen, og då blir det ein fest i Oslo, seier trønderen.
Følgde Alta-kampen med nervane i høgspenn
På Ulstein Group sitt hovudkontor i Ulsteinvik blei 1. divisjonskontrakt og cupfinale feira. Cupfinalebrus, Hødd-flagg, mat, og smil blant arbeidande Hødd-supporterar.
– Eg måtte ta inn Alta-kampen for å følgje med der på tampen, fortel Ingebjørn Røren.
Ihuga Hødd-fan, som jobbar i Ulstein Design til vanleg.
Siste del av Alta mot Tromsdalen blei nesten for mykje, seier Røren.
– Det blei mykje meir spennande enn høgst nødvendig.
Måtte på fjellet
For Hødd-sjef André Nevstad enda spenninga i ein fjelltur.
– Eg fekk god oppdatering til pause, då trudde eg at ting såg bra ut, seier Nevstad.
– Men så blei utviklinga i kampen som det blei. Det blei nervepirrande og veldig dramatisk til ting ramla på plass.
Men det ramla på plass, og no er alt fint og flott for Hødd.
– Det er veldig kjekt at Hødd, med naud og neppe, held plassen i Adeccoligaen. Dei held heime der. No gler vi oss til å få sjå Hødd i cupfinalen, seier Tore Ulstein, visekonsernsjef i Ulstein Group.