Regjeringa løyver 8,5 millionar kroner til prosjektet Kunnskapsparken Kristiansund i 2024. Det lanserte Arbeiderpartiet og Senterpartiet på Campus-konferansen tysdag.
Prosjektet tar over rolla til Høgskolesentret med å utvikle høgare utdanning i byen no som Campus Kristiansund snart står klar. Samstundes er det kjent at Høgskolesentret mistar det faste årlege løyvet på åtte millionar kroner over statsbudsjettet frå neste år.
Forsking- og høgare utdanningsminister, Sandra Borch (Sp) er imponert over det nye campus-bygget i Kristiansund.
I dag fekk ho omvising i det som skal bli nye Campus Kristiansund. Ho meiner at det er eit bygg og eit samarbeid som andre bør lære av.
– Det er utruleg bra at dei har bygd bygget i norsk tre. Det ser stort ut utanfrå og er utruleg kult. Eg trur at samarbeidet mellom privat og offentleg er litt av nøkkelen til at ein har lykkast så bra. Andre bør sjå til Kristiansund og det ein har fått til her, seier Borch.
Rektor ved Høgskolen i Molde, Steinar Kristoffersen, blir prosjektleiar for nye utdanningar ved Campus Kristiansund. Det skriv Møre og Romsdal fylkeskommune i ei pressemelding.
Han skal jobbe for å skaffe nye, unike og økonomisk berekraftige utdanningar til Campus Kristiansund, står det i pressemeldinga.
Studentsamskipnaden får 14 millionar kroner til å bygge 40 nye studenthyblar i Kristiansund.
– Dette gjer det meir attraktivt å vere student i Kristiansund, seier Henrik Stensønes i Kristiansund Senterparti (bildet).
Regjeringa gir 646 millionar for å bygge 1650 nye studentbustader fordelt på 17 byggeprosjekt i Noreg.
Jøran Gården, dagleg leiar ved Høgskolesenteret i Kristiansund, seier de har hatt ei gledeleg utvikling både når det gjeld studietilboda dei har hos seg og kor mange som får tilbod om studieplass. Alle studentane i Kristiansund er knytt til studiar frå enten Høgskolen i Molde eller Dronning Mauds Minne Høgskole i Trondheim.
– No treng vi meir plass, så vi ventar spent på utviklinga av Campus Kristiansund. Med dette vil vi kunne halde fram med å utvikle oss og vakse. Vi har også hatt ein lågare nedgang i søkarar til barnehagelærar enn på landsbasis, noko vi synest er positivt, seier Gården.
