«Byrampen» har blitt ramponert

Då Anita Jacobsen Marø gjekk ein morgontur til Aksla søndag oppdaga ho at glaset på utsiktspunktet «Byrampen» hadde blitt knust. Like ved glaset låg det ein stor stein som truleg er årsaka til det knuste glaset.

Utsiktspunktet «Byrampen» ligg om lag midtvegs i trappene opp mot Fjellstuen i Ålesund og har blitt eit populært turistmål og ynda fotoobjekt.

• Les også: Vinneren er: Byrampen
• Les også: – Ålesund er et stykke kunst

Truleg hærverk

Det nyetablerte utsiktspunktet «Byrampen» var ein del av renoveringsarbeidet av Fjellstuetrappene og blei opna i fjor. Fjellstuetrappene er med sine 418 trappetrinn eit av dei største turistmåla i Ålesund og blir besøkt av tusenvis av turistar kvart år.

Då NRK kontaktar politiet og Ålesund kommune søndag føremiddag er det ingen av dei som har blitt kontakta om skaden. Men allereie klokka 12.00 var prosjektleiar og avdelingsingeniør i Ålesund kommune, Steven Bendal, på plass for å undersøke skaden.

– Det ser ut som om nokon har tatt ein stein som låg i nærleiken og brukt den til å kaste eller slå mot glaset, seier han.

– Trist

Også denne dagen er det mange som har tatt turen til Fjellstuetrappene. Mange stopper opp og kommenterer skaden. – Så unødvendig, seier fleire av dei.

Det er totalt fem glasstykke på «Byrampen», og det er eit av desse som no er knust. I tillegg har det kome skader på sjølve platået. Steinen som har blitt brukt er relativt stor og Bendal er sikker på at skaden ikkje har skjedd med eit uhell.

– Eg veit kvar steinen låg og det punktet er om lag tre meter unna og omtrent ein meter lågare enn utsiktspunktet. Tyngdekrafta kan umogleg ha tatt den opp hit, og den veg såpass mykje at vinden ikkje kan ha flytta den. Nokon må ha løfta den, seier han.

– Det er veldig trist at nokon har gjort dette. Spesielt dumt er det at det skjer midt i turistsesongen når det er mange som tek turen til Fjellstuetrappene.

Stenger «Byrampen»

Hærverket er no meldt til politiet og Bendal ber også om tips frå publikum.

– Vi vil gjerne få beskjed dersom nokon har sett noko, seier han.

Glaset på «Byrampen» er sikkerheitsglas og det er difor ikkje farleg å gå ut på rampen, fortel Bendal. Kommunen bestemte seg likevel for å stenge utsiktspunktet søndag ettermiddag.

– Det blir gjort for å vareta sikkerheita til dei som bruker trappene, opplyser kommunen.

Det er så langt uklart kor lang tid det vil ta å skaffe eit nytt glas til rampen.