Studentar over heile landet kjempar no for å skaffe seg hybel før studiane startar. Musikkstudenten Sondre Ferstad frå Skodje på Sunnmøre har valt ei litt utradisjonell løysing og har i staden snikra eit mikrohus. Han fortel at det er kjekt å få skape sitt eige hus i ein trong hybelmarknad.
– Gleda av å bygge og gleda av å sjå at det blir, før var det ikkje eit hus, men no er det eit hus. Det blir som å lage ei låt, før var det ikkje ei låt, men no er det blitt det.
14 kvadratmeter
Musikkstudent og mikrohus-byggar, Sondre Ferstad, fortel at det er fleire som har moglegheit til å gjere som han og bygge sin eigen hybel.
Foto: Frode Berg / NRKI mikrohuset, som om eit par veker skal vere på plass i Trondheim, har Ferstad fått plass til peis, kjøkken, toalett, seng og alt som er nødvendig, på berre 14 kvadratmeter.
– Eg lir inga naud i dette huset, og likevel har eg fått plass til det på ein tilhengar. Det er det flotte. I dette huset her må eg tenke over innkjøpa mine, kva kan eg handle og kor mykje. Huset er så lite at om ein startar å fylle det med ting så blir det fullt, fortel Ferstad.
Ferstad trur at den løysinga han har vald i staden for å leige hybel og heller bygge seg eit mikrohus, er noko som er mogleg for fleire.
– Dette er mogleg for veldig mange. Det handlar om å vere dedikert nok og sette av nok tid til planlegging. Alle kan lære å sette inn eit vindauge og bruke ein drill.
Lang tid
Musikkstudent og mikrohus-byggar, Sondre Ferstad, gler seg til å flytte inn i det nye huset sitt.
Foto: Frode Berg / NRKTil studiestarten skal huset trekkast til Trondheim og Ferstad har allereie fått fleire tilbod om stadar huset kan stå. Han ser for seg at mikrohuset kan vere bustaden hans i lang tid framover.
– Eg meiner at dette huset har det eg treng, så difor ser eg også for meg at dette er ein stad eg kan bu i all overskodeleg framtid. Eg gler meg veldig til å flytte inn. Det blir morosamt å sjå korleis kvardagen blir her, få folk på besøk og leve eit vanleg liv i eit nytt hus.
