Mellom 30 og 50 personar var samla utanfor ein utestad i ein nordmørskommune i fjor sommar, då valdsepisoden skjedde.
Ein mann skubba fleire gongar den fornærma overende, og ga han også fleire spark.
For dette er han dømt til 45 dagar i fengsel.
Nærast livlaus
Men etter at den fornærma blei liggande nærast livlaus etter mishandlinga, kom 21-åringen og sparka, trampa eller stempla den fornærma.
Dette blei utført med stor kraft ovanfrå og ned mot den fornærma sitt ansikt.
Lagmannsretten har lagt avgjerande vekt på forklaringar frå fire vitne som sat i ein bil nokre meter frå valdsstaden.
Fleire skadar
Offeret fekk fleire skadar i ansiktet og i hovudet, mellom anna brekt nasebein og nedsett hørsel og øyresus.
Fleirtalet i retten er i tvil om 21-åringen kan skuldast for dette, og opnar for at den fornærma kan ha fått skadane før 21-åringen blanda seg inn.
Men lagmannsretten står samla i vurderinga at handlinga var uprovosert og svært brutal.
Åtte månader
Fleirtalet held fast på straffa i tingretten, åtte månader fengsel, medan mindretalet ville skjerpe straffa til ti månader fengsel.
21-åringen må vidare betale 4 000 kroner i erstatning, og saman med den andre valdsutøvaren 10 000 kroner i oppreising.