– Konklusjonen til brannteknikkar på staden er at brannen er påsett, seier Grete Hjelle, etterforskingsleiar i Sunnmøre politidistrikt til NRK.no.
Det var i 03.30-tida natt til søndag at 110-sentralen i Møre og Romsdal melde om brann i ein bustad like ved Høddvoll i Ulsteinvik.
Brannen starta i den eine delen av ein tomannsbustad. 12 personar, blant anna fleire barn, vart evakuert frå bustadane. Ingen personar vart fysisk skadd i brannen. Kriminalteknikarar har jobba på staden heile søndag, og i 14.00-tida søndag kunne politiet stadfeste at brannen var påsett.
– Brannen skal ha starta i ei bod som stod inn til bustaden, og skal så ha spreidd seg vidare til resten av huset, seier Hjelle.
Ho vil ikkje kommentere korleis brannen vart starta.
- Les også:
Ser bort frå hatkriminalitet
Politiet har søndag gjennomført avhøyr av personane som var i tomannsbustaden då den byrja å brenne, samt rundspørjing i nærområdet. Politiet vil halde fram med avhøyr og etterforsking måndag.
Etterforskingsleiaren fortel at dei så langt ikkje har nokon mistenkte i saka.
Alle dei 12 bebuarane i tomannsbustaden er utanlandske statsborgarar, men det skal ikkje vere mistanke om rasistiske motiv bak brannen.
– Nei, vi har ingen haldepunkt for at motivet for brannen var rasisme eller hatkriminalitet, seier Hjelle.
– Er det ei moglegheit de utforskar?
– Vi held alle moglegheiter opne, men per no har vi ingen haldepunkt for at rasisme skal vere motivet, seier Hjelle.
Brann også for tre veker sidan
Også for om lag tre veker sidan sette nokon fyr på trappa utanfor den andre delen av tomannsbustaden.
Brannen vart raskt sløkt, og det var berre snakk om små skader på bustaden. Hjelle fortel at dei ikkje ser nokon samanheng mellom dei to brannane.
– Den brannen er oppklart og vedkomande som starta den brannen har vore i varetekt sidan den gong, så det er ikkje snakk om same person, seier ho.
– Kva var motivet i denne saka?
– Det ønskjer eg ikkje å kommentere på dette tidspunktet, seier Hjelle.