Raset var det tredje på under eit år.
Siste åtvaring
Då raset gjekk på Oppdølsstranda i går kveld hadde ein buss akkurat passert, og neste buss måtte stoppe fordi vegen vart uframkommeleg. Bjørg Aspås er hovedtillitsvald for dei som er organiserte i Tansportarbeider-forbundet i Nettbuss Møre. Ho er redd det snart går skikkeleg gale.
- Det er veldig nært at det går liv no. Trass i at geologane kvar gong seier det er trygt så er ikkje Oppdølsstranda trygg. Eg trur vi må ta dette som ei siste åtvaring før det skjer ei katastrofe, seier Aspås.
Stort steinras
Seint tysdag kveld gjekk eit hundre meter breidt steinras på Oppdølsstranda. Vegen er stengd, og raset sette fyr på terrenget i området. Dette er det tredje raset på under eit år på Oppdølsstranda. I august 2008 blei ein mann hardt skadd så raset tok bilen han køyrde. I fleire periodar har det gått båtskyss forbi Oppdølsstranda på grunn av rasfaren.
Gruar seg
Bjørg Aspås fortel at bussjåførane gruar seg kvar gong dei skal køyre denne strekninga.
- Du kan tenkje deg sjølv korleis det er å site å vente på at det skal dette stein i hovudet på deg. Ein del av dei gruar seg for å køyre denne strekninga. Dei kan sjølvsagt ikkje site og tenkjer på det heile tida, då blir det jo uhaldbart å gå på arbeid, seier Aspås.
Nære på
Raset gjekk like etter at ein buss hadde passert området og like før ein annan buss skulle køyre der.
- Ja, dette var nære på. Det kunne ikkje ha kome nærare no. Eg trur ikkje vi skal gamble på at det kjem endå nærare, seier Aspås.
Ferje
Bjørg Aspås er ikkje i tvil om at noko må gjerast straks i påvente av at tunnelen blir ferdig om nokre år.
- No må det kome ferje på strekninga så fort som dei berre kan få det til. Eg høyrer at geologane seier det er trygt på Oppdølsstranda. Men no meiner eg stranda må stengast, seier Bjørg Aspås.
