Molde Vann og Avløp har ikkje mannskap som er til stades ved vassbehandlingsanlegget i Hindalsøra like ved Øverlandsvannet i Molde, til ei kvar tid.
Alarmanlegget overvakar systemet og skal varsle ved feil, men alarmen svikta i helga då store delar av byområda i Molde mellom Årø i aust, og Djupdalen i vest, fekk brunt vatn i kranane.
– Det er svært alvorleg at varslinga svikta i drikkevassforsyninga, og vi jobbar hardt for å få løyst problemet så raskt som mogleg, seier dagleg leiar Bjarte Koppen.
- Les også:
Veldig problematisk
Molde sitt vassbehandlingsanlegg forsyner byområda i Molde og Bolsøya, og får vatn frå Moldevannet, Bergsvatnet og Bårdsdalsvatnet som har tilsig frå fjell og myrområde.
Hindalsøa er eit fullreinseanlegg, der brunfargen blir fjerna med sandfilter og desinfisert med ultrafiolett UV-lys.
Det blir normalt ikkje brukt klor i denne prosessen, men i helga vart det sett i gong kloring som ein ekstra tryggleik inntil situasjonen er normal igjen.
– Vi fekk raskt sjekka opp at desinfiseringa fungerte som den skulle, og at det var fargefjerninga som hadde stoppa opp, seier Koppen.
– Det er veldig problematisk at varslinga ikkje fungerte, og vi kjem til å ha ei manuell rutine til vi veit kva som var årsaka, seier Koppen.
