Brukar sjøvegen for å kome seg til skulen

Dreneringsrøyret som skulle ta unna vassmengdene under fylkesvegen tetta seg laurdag kveld. Elva fløymde over og vaska vekk store delar av vegen. Det har ført til at mange må køyre lange omvegar – eller rett og slett ty til sjøen for å kome seg frå A til B.

• Les også: Fylkesveien raste bort

Heiv seg i båten

Då vegen forsvann var gode råd dyre. Rolf Arne Ramstad måtte finne ein måte å få dottera og niesa si til skulen – og båten vart løysinga.

– Vi blei tvinga til å tenke kreativt, og båten kan godt brukast så lenge vêret er fint. Vi var usikre på om bussane gjekk i dag, og viss dei gjekk så hadde dei garantert kome for seint til skulen, fortel far og onkel til jentene, Rolf Arne Ramstad.

Den lange omkøyringsvegen skaper vanskar for både skuleelevar og pendlarar i Herøy. Vegen er hovudfartsåra inn til Fosnavåg og det er no omkøyring via fylkesveg ti rundt Gurskøya (sjå kart).

Dei bur på Kalvnes i indre Tjørvåg. Det hadde tatt dei nesten ein time å køyre omvegen til skulen på Stokksund. Med båten klarte jentene å kome seg fram på berre 13 minutt.

– Vi har snakka om å ta båten til skulen før, så lenge vêret tillét det. Etter at det regna frå seg i helga har det vore rimeleg greitt, seier Ramstad.

Skremmande oppleving

Kona og dottera hans køyrde over den no øydelagde vegen like før den rasa.

– Det var skremmande å tenke på etterpå at dei for forbi like før vatnet tok med seg vegen, seier han.

Køyrer over markane med traktor

For sambygdingane Frode Berg Tjervåg og dottera ... blei traktoren nyttig. I staden for å køyre den lange omvegen har dei heller tatt seg over markane ved sidan av den øydelagde vegen for å kome seg til skulen.

– Vi bur berre 50 meter frå der vegen rasa saman. Det er på rett side i forhold til min jobb i Ulsteinvik, men feil i forhold til skulen. Då var det berre å få start på traktoren for å kome seg dit, fortel Tjervåg.

Elva tok med seg leire og stein

Han fortel at det buldra kraftig i elva laurdag kveld. Elva tvinga seg fram og laga fleire nye løp like rundt husveggane hans. Dei såg at dei store vassmengdene kom til å nå vegen, og var kjappe med å varsle politiet.

– Dei kunne ikkje kome med det same, men eg gjekk ned til vegen og hang opp sperringar. Det er ikkje lett å sjå eit hol i vegen midt på natta, spesielt ikkje i ei 80-sone.

• Les også: Veien kan bli stengt i flere dager

Heldigvis var det ingen som køyrde utfor vegen den kvelden. Det er vanlegvis mykje trafikk på fylkesvegen gjennom Tjørvågane – men den må no gå rundt Gurskøya.

– Eg kan ikkje huske sist vi sov så tungt. Utan trafikken har det vore heilt stille, seier Tjervåg.

Det er Ramstad einig i. Dei ser fram til fleire rolege dagar – inntil vegen er reparert.

– No får Moltustranda og Gursken merke kor mykje tungtransport vi vanlegvis får forbi her. Normalt sett passerer fleire titals vogntog kvar dag, seier Ramstad.